Sorumutu Estraordináriu Konsellu Ministrus loron 25 fulan-juñu tinan 2026

Konsellu Ministrus hala’o sorumutu estraordináriu iha Auditóriu Kay Rala Xanana Gusmão, iha Ministériu Finansas, Dili, no aprova ona projetu Rezolusaun Governu, ne’ebé aprezenta husi Vise-Ministra Finansas, Regina de Jesus, kona-ba kompozisaun Komité Revizaun Polítiku ba prosesu preparasaun Orsamentu Jerál Estadu ba tinan 2027.

Komité Revizaun Polítiku iha objetivu atu garante katak planu anuál husi servisus no entidades Setór Públiku Administrativu viavel no aliñadu ho prioridades nasionál ne’ebé estabelese iha Planu Estratéjiku Dezenvolvimentu tinan 2011-2030, iha Programa Governu, iha planu tempu médiu no dokumentu estratéjiku sira seluk. Komité mós iha responsabilidade atu asegura katak dotasaun orsamentál ne’ebé atribui tuir planu hirak ne’e no limite másimu ba despeza ne’ebé define ona, no mós garante katak inkluzaun dotasaun iha Orsamentu Jerál Estadu depende ba inskrisaun prévia husi ninia atividades iha planu servisu anuál ka entidade sira ne’e.

Komité Revizaun Polítiku ne’e sei prezide husi Primeiru-Ministru no kompostu mós hosi Vise-Primeiru-Ministru rua, Ministra Finansas, Ministru Obras Públikas no Ministru Planeamentu no Investimentu Estratéjiku. Sekretária Estadu Igualdade, Prezidente Institutu ba Defeza Direitu Labarik no reprezentante ida hosi Asosiasaun Defisiente Timor-Leste mós sei partisipa iha sorumutu Komité Revizaun Polítiku nu’udar observadór. REMATA