Iha loron 23 to’o 25 fulan-juñu tinan 2026 Ministru Administrasaun Estatál, Tomás do Rosário Cabral, partisipa iha Forum Nasoins Unidas kona-ba Servisu Públiku (UN Public Service Forum 2026) ne’ebé hala’o  iha Tbilisi, Jeórjia; ho tema “Transforma Instituisaun Públika sira liuhosi Inovasaun, Responsabilidade, Partisipasaun no Inkluzaun”. 

Timor-Leste nia partisipasaun tuir konvite husi Komisaun Organizadora, ne’ebé prezide husi Ministra Justisa Jeórjia, Paata Salia, no reflete rekoñesimentu internasionál ba progresu sira ne’ebé Timor-Leste alkansa ona iha modernizasaun Administrasaun Públika, liuliu  liuhosi modelu Balkaun Úniku no expansaun dijitalizasaun servisus públikus nian to’o iha nivel suku.

Forum ne’e  halibur ministrus, altu responsavel governamentál sira, reprezentantes hosi Nasoins Unidas, espesialistas, akadémikus, organizasaun sosiedade sivíl sira, setór privadu no parseiru dezenvolvimentu sira hodi diskute solusaun sira ne’ebé ho objetivu atu reforsa inovasaun, responsabilizasaun, partisipasaun, no inkluzaun iha prestasaun servisus públikus, ne’ebé promove administrasaun públika ida ne’ebé efisiente liután no sentrada ba sidadaun sira.

Sesaun abertura ne’e prezide hosi Primeiru-Ministru Jeórjia  nian, Irakli Kobakhidze, no partisipa mós hosi Subsekretáriu-Jerál Nasoins Unidas ba Asuntus Ekonómikus no Sosiais, Li Junhua, no Ministru Justisa Jeórjia  nian no Prezidente Komisaun Organizadora, Paata Salia.

Iha sesaun plenária dahuluk nian, ne’ebé dedika ba tema “Prestasaun servisu públiku universál no promosaun administrasaun públika ida ne’ebé inkluziva liuhosi inkluzaun dijitál”, Ministru Tomás do Rosário Cabral aprezenta esperiénsia Timor-Leste nian kona-ba implementasaun Balkaun Úniku  iha munisípiu 12, Rejiaun Administrativa Espesiál Oe-kusi Ambenu (RAEOA) no Autoridade Administrativa Ataúru, nune’e mós prosesu dijitalizasaun servisus públikus, ne’ebé implementa ona iha  suku 472 iha rai laran.

Durante Forum ne’e, Ministru hasoru malu ho ninia omólogu hosi Jeórjia, Paata Salia, hodi ko’alia kona-ba oportunidade kooperasaun iha área dijitalizasaun no modernizasaun servisus públikus. Durante sorumutu  ne’e, Ministru Jeórjia nian fahe nia nasaun nia esperiénsia kona-utilizasaun transformasaun dijitál hodi hasa’e transparénsia, reforsa  instituisaun públika sira, no aumenta konfiansa sidadaun sira  nian.

 Ministru Tomás do Rosário Cabral agradese ba konvite ne’ebé hato’o ba Timor-Leste no hatudu interese Governu nian hodi aprofunda kooperasaun no troka esperiénsia ho nasaun sira ne’ebé dezenvolve ona solusaun inovadora iha administrasaun públika. Governante ne’e mós konvida Ministru Justisa Jeórjia  nian atu vizita Timor-Leste hodi hatene funsionamentu hosi Balkaun Úniku. Parte rua konkorda atu mantein kontaktu tékniku ho intensaun atu prepara akordu kooperasaun ida iha futuru.

Durante vizita ba Jeórjia, delegasaun Timór ne’ebé xefia husi Ministru Administrasaun Estatál no kompostu husi Xefe Gabinete, Diresaun-Jerál ba Simplifikasaun no Modernizasaun Administrativa Lokál, no mós Asesora Jurídika Ministériu nian, hala’o mós sorumutu  bilaterál ho responsavel governamentál sira hosi Tailándia, Indonézia, no Uzbekistaun. Sorumutu  hirak-ne’e fó oportunidade atu troka esperiénsia kona-ba tema prinsipál sira hosi  Forum no mós identifika oportunidades ba dezenvolvimentu inisiativa kooperasaun nian iha futuru iha área administrasaun públika no prestasaun servisus ba sidadaun sira.