Iha loron 22 fulan-juñu tinan 2026, Vise-Ministru Administrasaun Estatál, Jacinto Rigoberto Gomes de Deus, prezide serimónia abertura formasaun kona-ba Desentralizasaun Administrativa, ne’ebé hala’o iha sala Maria Tapo, iha Bobonaru. Inisiativa ne’e hetan partisipasaun husi Diretór-Jerál Institutu Nasionál Administrasaun Públika (INAP), Policarpo Amílcar Boavida, no Prezidente Autoridade Munisipál Bobonaru nian, Paulo Moniz Maia. 

Atividade formasaun ne’e destinadu ba dirijente no funsionáriu sira hosi Autoridade Munisípiu Bobonaru no ho objetivu atu hametin kapasidade no mós koñesimentu sira ne’ebé presiza hodi prepara kondisaun mínimu sira ne’ebé nesesáriu ba implementasaun desentralizasaun podér lokál.

Iha nia diskursu, Vise-Ministru Administrasaun Estatál salienta katak formasaun ne’e ho objetivu atu asegura  implementasaun  polítika desentralizasaun ida ne’ebé adekuadu, hadi’a’ kualidade prestasaun servisus públikus ba komunidade lokál sira, no mós reforsa boa governasaun iha munisípiu sira.

Jacinto Rigoberto Gomes de Deus subliña liu tan katak konsolidasaun prosesu desentralizasaun ne’e depende ba dezempeñu responsavel husi funsionáriu no dirijente munisipál sira, hodi nune’e bele kontribui ba dezenvolvimentu sustentável iha rejiaun Bobonaru.

Gouvernante ne’e refere mós katak Autoridade Munisipál Bobonaru tenke preparadu atu presta servisus ho kualidade ba populasaun no asegura administrasaun públika ida ne’ebé efisiente hodi serbí ba dezenvolvimentu munisípiu.

Durante serimónia ne’e, Vise-Ministru husu ba partisipante sira atu serbisu hamutuk hodi harii munisípiu ida ne’ebé justu, igualitáriu no prósperu liu.

Formasaun ne’e hala’o iha ámbitu prosesu desentralizasaun administrativa no instalasaun podér lokál ne’ebé la’o hela iha Timor-Leste, ne’ebé lidera husi Ministériu Administrasaun Estatál tuir Lei n. 3/2016 kona-ba Podér Lokál no Desentralizasaun Administrativa, no mós ho Estratéjia Desentralizasaun Administrativa no Instalasaun Órgaun Reprezentativu Podér Lokál nian sira ba períodu 2025–2028. Iha ámbitu hosi prosesu ida-ne’e, Governu halo ona avaliasaun ba kondisaun mínimu iha munisípiu sira, atividade reforsu kapasidade institusionál, no akompañamentu  diretu ba  autoridade munisipál sira, ho objetivu atu kria kondisaun sira ne’ebé presiza ba implementasaun podér lokál ne’ebé prevee ona ba tinan 2027 no ba transferénsia neineik kompeténsia sira hosi nivel sentrál ba nivel lokál.

Serimónia abertura ne’e hetan mós partisipasaun husi diretór servisu  munisipál sira, formandus no konvidadu sira seluk.