Sekretáriu Estadu Komunikasaun Sosiál, Expedito Loro Dias Ximenes, hasoru malu ho Ministru Komunikasaun Malázia nian, Datuk Fahmi Fadzil, iha loron 20 fulan-juñu, iha Penang, hodi ko’alia kona-ba oportunidade sira ba kooperasaun bilaterál iha setór komunikasaun sosiál. Sorumutu ne’e mós hetan partisipasaun husi Prezidente Ajénsia Notisioza TATOLI, Noémio Mateus Soares Falcão, no reprezentante  sira husi ajénsia notisioza malaia, BERNAMA. 

Durante sorumutu ne’e, parte rua ne’e troka sira-nia hanoin kona-ba dalan atu hametin relasoins entre Timor-Leste no Malázia iha área komunikasaun sosiál, ho objetivu atu promove dezenvolvimentu informasaun profisionál, kredivel no responsavel, no mós reforsa kapasidade institusionál sira.

Entre tema prinsipál sira ne’ebé ko’alia mak utilizasaun no regulamentu hosi intelijénsia artifisiál, estratéjias hodi kombate notísia falsu sira no dezinformasaun, no mós importánsia husi kontinuasaun formasaun ba jornalista timoroan sira, ho objetivu atu hadi’a kualidade jornalizmu no adapta ho mudansas teknolójikas.

Durante sorumutu ne’e, Sekretáriu Estadu Komunikasaun Sosiál mós hato’o preokupasaun  kona-ba nesesidade ba prezensa no envolvimentu  ida ne’ebé boot liu husi plataforma dijitál prinsipál sira, hanesan Google, YouTube no Facebook, iha Timor-Leste, atu nune’e bele kontribui ba dezenvolvimentu ekosistema mídia nasionál nian.

Ministru Komunikasaun Malázia nian salienta katak  kooperasaun entre país rua iha área ida-ne’e sei reforsa liuhosi implementasaun akordu kooperasaun ne’ebé asina tiha ona entre ajénsia notísia BERNAMA no TATOLI.

“Akordu ida-ne’e sei sai baze importante ida atu promove partilla esperiénsia sira, dezenvolvimentu rekursus umanus, troka informasaun no reforsa kapasidade profisionál ba instituisaun mídia Governu nian sira hosi nasaun rua ne’e, hodi fó dalan ba sira atu hatán ba dezafiu  komunikasaun nian iha era dijitál”, dehan Datuk Fahmi Fadzil.

Iha loron 19 fulan-juñu, iha ámbitu  hosi dezlokasaun  ba Malázia, Sekretáriu Estadu Komunikasaun Sosiál no delegasaun hosi Ajénsia Notisioza TATOLI partisipa mós, iha jantár benvindu ba selebrasaun Hari Wartawan Nasional (HAWANA) 2026 nian, ne’ebé hala’o iha Otél Crowne Plaza, iha Penang..

Eventu ne’e oferese husi Governadór Estadu Penang, Tun Ramli Ngah Talib, hodi rekoñese papél mídia nian iha dezenvolvimentu nasoins no halibur reprezentantes hosi órgaun  komunikasaun sira,  jornalistas,  autoridade governmental sira, no mós konvidadus husi país oioin iha Sudeste Aziátiku.