Iha loron 8 fulan-juñu, Vise-Primeiru-Ministru no Ministru Dezenvolvimentu Rurál no Abitasaun Komunitária (MDRHC, sigla iha lian portugés), Mariano Assanami Sabino, inaugura Programa Revitalizasaun Komunitária iha aldeia Manehalo, iha suku Manelobas, postu administrativu Laulara, munisípiu Aileu, ho objetivu atu haforsa produsaun lokál no hadi’a kondisaun moris populasaun nian. 

Durante serimónia ne’e, governante ne’e inaugura infraestrutura  oioin no inisiativas ne’ebé ho objetivu atu apoia dezenvolvimentu ekonómiku iha komunidade rurál sira, inklui projetu  hakiak manu broiler ida, tanke fornesimentu bee ida, sintina públika no área agríkola sira ne’ebé kompleta ho estufa (fatin ne’ebé taka metin ho vidru ka plástiku) no sistema irrigasaun modernu.

Iha ninia diskursu, Mariano Assanami Sabino destaka katak programa ne’ebé Governu implementa ho objetivu atu dudu dezenvolvimentu ekonómiku  komunidade sira nian no husu  ba grupu benefisiáriu sira atu dezenvolve sira-nia atividade ho kompromisu no responsabilidade.

“Objetivu husi inisiativa hirak-ne’e mak atu hasa’e produsaun agríkola no pekuária, hodi hametin ekonomia familiár no garante fornesimentu ba merkadu lokál no nasionál sira”, nia hateten.

Vise-Primeiru-Ministru subliña mós nesesidade atu hametin produsaun ai-han nutritivu sira hodi kontribui ba redusaun malnutrisaun infantíl, ho temi katak, tuir dadus ofisiál, besik 47% hosi labarik timoroan sira hasoru problema malnutrisaun.

 “Ita presiza envolvimentu husi komunidade tomak hodi prodús ai- han ne’ebé saudavel liu, tantu ba konsumu doméstiku no mós apoia ba programa alimentasaun eskolár”, nia hateten.

Mariano Assanami Sabino mós husu  atu promove armonia sosiál no respeitu ba malu iha komunidades, hodi enkoraja foin-sa’e sira atu foka liu ba harii futuru ida  ne’ebé di’ak-liu no evita konflitu familiár no komunitáriu.

Tuir dadus husi MDRHC, hosi tinan 2024 to’o tinan 2026, Programa Revitalizasaun Komunitária sei kobre aldeia 20 iha munisípiu Aileu, liuhusi investimentu ida ne’ebé boot liu dolar amerikanu rihun 180.

Inisiativa ne’e halo parte iha  estratéjia Governu nian ba dezenvolvimentu rurál, ne’ebé ho objetivu atu hasa’e produsaun lokál, hadi’a kondisaun moris populasaun sira nian no hamenus moris-kiak iha área  sira ne’ebé dook liu husi sentru sidade.