Governu Timor-Leste hato’o solidariedade ba Filipinas hafoin rai-nakdoko ne’ebé akontese iha Mindanau
Prezidénsia Konsellu Ministrus
Portavós Governu Timor-Leste
IX Governu Konstitusionál
...........................................................................................................................
Komunikadu Imprensa
Governu Timor-Leste manifesta solidariedade ho Filipina hafoin rai-nakdoko ne’ebé akontese iha Mindanau
Governu Repúblika Demokrátika Timor-Leste hato’o ninia solidariedade ne’ebé kle’an ba Governu no povu Repúblika Filipinas hafoin rai-nakdoko ho magnitude 7,8 ne’ebé ohin akontese iha illa Mindanau, ne’ebé halo ema mate, kanek, estragus makas ba infraestruturas , no mós evakuasaun populasaun sira tanba risku ba tsunami.
Iha momentu susar boot ida-ne’e, Timor-Leste hato’o nia sentidu kondolénsia kle’an ba família vítima sira no dezeja rekuperasaun lalais ba sira ne’ebé kanek. Governu Timor-Leste akompaña hela evolusaun situasaun ne'e ho preokupasaun no rekoñese serbisu autoridades filipinas, servisu emerjénsia no ekipa salvamentu sira ne’ebé mobiliza ona atu fó asisténsia ba komunidade sira ne’ebé afetadu.
Rai-nakdoko ne’e halo edifísiu sira monu, eletrisidade mate, no alerta kona-ba tsunami iha zona tasi-ibun balun iha Filipinas no mós nasaun sira seluk iha rejiaun ne’e. Autoridade sira kontinua avalia dimensaun hosi estragus no mós koordena operasaun resposta no rekuperasaun nian.
Ministru Prezidénsia Konsellu Ministrus no Portavós Governu nian, Agio Pereira, hateten katak “iha momentu tristeza ba povu filipinu ida-ne’e, Timor-Leste espresa nia solidariedade ba Filipinas, país amigu ida no parseiru kleur ona iha ámbitu ASEAN. Ami hato’o kondolénsia ba família vítima sira no dezeja rekuperasaun lalais ba vítima sira ne’ebé hetan kanek no mós komunidade sira ne’ebé afetadu hosi trajédia ida-ne’e”. REMATA
