Ministru Prezidénsia Konsellu Ministrus, Agio Pereira, ohin, loron 5 fulan-juñu tinan 2026, iha Palásiu Governu, simu Reprezentante hosi Banku Aziátiku Dezenvolvimentu (ADB) iha Timor-Leste, Stefania Dina, iha vizita kortezia ida ne’ebé marka rohan hosi ninia misaun durante tinan tolu iha Timor-Leste.  Partisipa mós iha sorumutu ne’e maka Michael Joseph Walsh, Responsavel Operasoins ADB iha Timor-Leste, ne’ebé sei asume interinamente koordenasaun instituisaun nian iha país ne’e to’o nomeasaun ba Reprezentante Rezidente foun ida. 

Durante sorumutu ne’e, Stefania Dina agradese ba Governu ba kolaborasaun no apoiu ne’ebé fó durante ninia mandatu, no mós halo balansu ida kona-ba serbisu ne’ebé ADB hala’o ona iha Timor-Leste iha tinan tolu ikus ne’e, hodi reafirma kompromisu instituisaun nian atu kontinua apoia prioridade nasionál ba dezenvolvimentu.

Ministru Agio Pereira ko’alia perkursu Timor-Leste nian dezde prosesu restaurasaun independénsia to’o ohin loron, hodi destaka dezafius ne’ebé hasoru no progresu sira ne’ebé alkansa ona hodi hametin instituisoins Estadu nian. Nia subliña mós importánsia atu kontinua investimentu iha infraestruturas estratéjikas no asegura planeamentu ida ne’ebé sustentavel no rigorozu ba rekursus públikus, ko’alia mós dezafiu sira ne’ebé relasiona ho integrasaun rejionál, kontestu jeopolítiku no prioridades dezenvolvimentu nasionál iha tinan hirak tuir mai.

Sorumutu ne’e remata ho espresaun rekoñesimentu ba serbisu ne’ebé hala’o ona husi Stefania Dina durante ninia misaun iha Timor-Leste no mós reafirmasaun kompromisu husi parte rua  atu kontinua hametin kooperasaun entre Timor-Leste no Banku Aziátiku Dezenvolvimentu.