Governu, liuhosi Ministériu Asuntus Kombatentes Libertasaun Nasionál, iha loron 1 no 2 fulan-juñu tinan 2026, kontinua Programa Validasaun ba Rejistu Frente Esterna/Diplomátika iha Luta Libertasaun Nasionál Timor-Leste. Inisiativa ida-ne’e ho objetivu atu rekoñese, dokumenta no fó onra ba kontribuisaun boot husi frente diplomátika iha rezisténsia hasoru okupasaun indonézia, ho prezerva memória istórika no destaka esforsus husi sidadaun timoroan sira ne’ebé atua iha senáriu internasionál hodi defende independénsia. 

Durante sesaun sira, analiza testemuñu, dokumentu no rejistu sira ne’ebé relasiona ho partisipasaun membru sira hosi frente esterna/diplomátika durante períodu rezisténsia nian. Prosesu ne’e nia objetivu atu konsolida informasaun istórika no kontribui ba konstrusaun rejistu ida ne’ebé rigorozu kona-ba sidadaun sira ne’ebé hala’o funsaun reprezentasaun, sensibilizasaun no mobilizasaun diplomátika hodi apoia autodeterminasaun no independénsia Timor-Leste nian.

Durante luta libertasaun nasionál, frente diplomátika hala’o knaar importante ida hodi defende kauza Timor nian iha Nasoins Unidas nia oin, governu estranjeiru, no organizasaun internasionál sira. Sira-nia asaun kontribui hodi mantein situasaun Timór-Leste nian iha ajenda internasionál no mós hametin apoiu polítiku no diplomátiku ba povu Timor nia direitu ba autodeterminasaun.

Entre sira ne’ebé partisipa iha sesaun sira ne’e maka Ministru Prezidénsia Konsellu Ministrus, Agio Pereira, Ministru Asuntus Kombatentes Libertasaun Nasionál, Gil da Costa Monteiro “Oan Soru”, Sekretáriu Estadu Veteranus, César dos Santos da Silva, eis Primeiru-Ministru Mari Bim Amude Alkatiri no Estanislau A. da Silva, Embaixadora Timor-Leste ba Austrália, Inês Almeida, Embaixadór Timor-Leste ba Brunei Darussalam, Abel Guterres, Prezidente Administrasaun Konsellu Kombatentes Libertasaun Nasionál, Vidal de Jesus “Riak Leman”, eis-Ministru Roque Rodrigues no Embaixadora Pascoela Barreto.