Vise-Primeiru-Ministru no Ministru Koordenadór Asuntus Sosiais, Mariano Assanami Sabino, partisipa iha loron 21 fulan-maiu tinan 2026, iha serimónia abertura ba Festivál Literasia, ne’ebé hala’o iha Centro Nacional Chega!, Dili, iha ne’ebé nia destaka importánsia hosi leitura no eskrita ba edukasaun joven timoroan sira. 

Iha nia diskursu abertura eventu ne’e nian, Mariano Assanami Sabino afirma katak promove leitura sai nafatin esensiál iha tempu ne’ebé marka ho evolusaun teknolójika ne’ebé lalais no aumentu iha utilizasaun Intelijénsia Artifisiál (IA).

“Leitura ajuda ita atu komprende ita-nia istória, aprende hosi pasadu no adapta valór importante sira ba realidade foun sira ne’ebé ita hasoru”, nia hatete.

Vise-Primeiru-Ministru alerta mós kona-ba risku sira hosi dependénsia demaziadu ba teknolojia dijitál, ho konsidera katak uzu Intelijénsia Artifisiál ne’ebé laloos bele hamenus kapasidade hanoin krítiku no esforsu individuál.

“Leitura tenke kontinua sai hanesan aliserse ba ita-nia identidade, kultura no karakter”, nia hatutan.

Festivál Literasia ne’e ho objetivu atu insentiva interese ba leitura, eskrita no debate intelektuál, no mós promove ábitu aprendizajen no reflesaun krítika entre foin-sa’e sira no komunidade ein-jerál.

Inisiativa ne’e hala’o iha kontestu ida ne’ebé Timor-Leste reforsa hela esforsu sira hodi hasa’e nivel edukasaun no kualifikasaun hosi joven sira, hanesan mós preparasaun ba partisipasaun ida ne’ebé ativa liu iha espasu rejionál no internasionál, inklui ASEAN, CPLP, g7+ no Organizasaun Mundiál Komérsiu.