Ministru Prezidénsia Konsellu Ministrus, Agio Pereira, iha loron 26 fulan-maiu tinan 2026, iha Palásiu Governu, Dili, hasoru malu ho delegasaun ida hosi Gabinete Nasoins Unidas kontra Droga no Kriminalidade (UNODC), ne’ebé lidera hosi Delphine Schantz, Reprezentante Rejionál ba Sudeste Aziátiku no Pasífiku, iha ámbitu vizita ofisiál delegasaun ne’e nian mai Timor-Leste, ne’ebé hala’o hosi loron 25 to’o loron 26 fulan-maiu tinan 2026. 

Durante sorumutu ne’e, ko’alia kona-ba kestaun sira ne’ebé relasiona ho koordenasaun governamentál globál, prioridade polítika nasionál no oportunidade ba kooperasaun hodi aliña apoiu UNODC nian ho objetivu governasaun no dezenvolvimentu institusionál Timor-Leste nian.

Delegasaun UNODC aprezenta serbisu ne’ebé hala’o ona hosi organizasaun ne’e, iha apoiu ba país Sudeste Aziátiku no Pasífiku hamutuk 29 hodi kombate krime organizadu transnasionál no siberkrime, liuhosi inisiativas kapasitasaun institusionál, formasaun téknika no apoiu operasionál ba autoridade nasionál sira. Fahe mós informasaun kona-ba tendénsia krime sira ne’ebé buras daudaun iha rejiaun ne’e, inklui fraude online ne’ebé relasiona ho krime organizadu.

Iha sorumutu ne’e, Ministru Agio Pereira destaka katak kombate ba krime transnasionál, liuliu siberkrime nu’udar prioridade nasionál. Governante ne’e hateten katak Governu dezenvolve hela pakote lejizlativu siberseguransa nian ida ne’ebé ho objetivu atu reforsa kuadru jurídiku no institusionál iha área ida-ne’e, ne’ebé inklui medida sira relasiona ho seguransa siberespasu, servisu dijitál, no mós prevensaun no resposta ba insidente sibernétiku sira.

Diskute mós Konvensaun Nasoins Unidas nian kona-ba Siberkrime, ho Reprezentante Rejionál UNODC enkoraja Timor-Leste atu konsidera asinatura instrumentu internasionál ida-ne’e, ne’ebé agora daudaun iha signatáriu na’in-75, maibé foin de’it nasaun tolu maka ratifika, ho ratifikasaun 40 ne’ebé presiza atu bele tama iha vigór. Delegasaun ne’e mós hato’o ninia vontade atu fó apoiu tékniku ba prosesu lejizlativu nasionál iha área ida-ne’e, inklui halo revizaun ba projetu lei kona-ba siberkrime ne’ebé oras ne’e iha hela preparasaun.

Durante sorumutu ne’e ko’alia mós kona-ba posibilidade atu Timor-Leste asina Konvensaun ne’e durante sesaun altu nivel hosi Asembleia-Jerál Nasoins Unidas tuir mai iha Novaiorke, ne’ebé marka ona ba fulan-setembru tinan ida-ne’e.

Delphine Schantz reafirma disponibilidade UNODC nian atu kontinua apoia Timor-Leste iha reforsu kapasidade nasionál hodi prevene no kombate krime organizadu transnasionál no siberkrime.