Governu liuhosi Ministériu Finansas, iha kolaborasaun ho ministériu relevante sira no Autoridade Munisípiu sira, konklui, iha loron 22 fulan-maiu tinan 2026, prosesu Konsulta Públika nasionál hodi apoia preparasaun Orsamentu Jerál Estadu ba tinan 2027 (OJE 2027), ho objetivu atu rekolle kontribuisaun sira hosi populasaun kona-ba prioridade dezenvolvimentu no prestasaun servisus públikus nian. 
Prosesu ne’e ofisialmente hahú iha loron 4 fulan-maiu tinan 2026, ho konsulta sira ne’ebé hala’o ona iha munisípiu hotu-hotu no mós iha Ataúro no Rejiaun Administrativa Espesiál Oe-kusi Ambenu (RAEOA). Hafoin halo konsulta ho parseiru sosiál sira, prosesu ne’e ofisialmente taka ho serimónia ida ne’ebé hala’o iha Autoridade Munisipál Dili.
Inisiativa ne’e ho objetivu atu halibur sidadaun sira-nia opiniaun, aspirasaun no perspetiva kona-ba dezafiu prinsipál sira dezenvolvimentu nian, lakunas iha prestasaun servisus públikus, no mós área prioritária sira ne’ebé presiza intervensaun, atu nune’e bele garante katak polítika públika no desizaun orsamentál sira ba tinan 2027 reflete nesesidade loloos komunidade sira-nian.
Konsultas ne’e involve setór oin-oin sosiedade nian, inklui xefe suku, organizasaun sosiedade sivíl, reprezentante feto no ema ho defisiénsia, juventude, setor privadu, veteranu no reprezentante relijiozu sira. Prosesu ne’e kombina diskusaun grupu foku no levantamentu sira, ho objetivu atu halibur dadus ne’ebé konsistente, reprezentativu no bazeia ba evidénsia hodi apoia planeamentu no definisaun prioridade governu nian.
Konsulta públika ho dimensaun prátika no orientada ba asaun, no hein katak kontribuisaun sira ne’ebé halibur ona sei analiza no integra iha prosesu planeamentu nasionál no mós preparasaun OJE tinan 2027 nian.
Vise-Ministra Finansas, Regina de Jesus de Sousa, afirma katak “konsulta ida ne’e la’ós formalidade administrativa de’it, maibé parte importante ida husi kultura diálogu no servisu hamutuk entre Governu no autoridade lokál sira. Dezenvolvimentu nasionál presiza kolaborasaun no responsabilidade hamutuk husi nivel nasionál tun to’o nivel suku. Ideia no rekomendasaun sira ne’ebé aprezenta sei analiza ho seriedade no konsidera iha preparasaun polítika sira no mós Orsamentu Jerál Estadu ba tinan 2027.”