Prezidente Repúblika, José Ramos-Horta, akompaña hosi Primeiru-Ministru, Kay Rala Xanana Gusmão, iha loron 20 fulan Maiu tinan 2026, prezide serimónia tau fatuk dahuluk ba konstrusaun rezidénsia ida ba estudante feto timoroan sira iha Dili, inisiativa ida ne’ebé hetan apoiu hosi Emiradus Árabes Unidus (EAU), liuhosi Prezidente Xeique Mohamed bin Zayed Al Nahyan. 

Durante serimónia ne’e, asina mós Memorandu Entendimentu ida entre Ministru Negósius Estranjeirus no Kooperasaun, Bendito dos Santos Freitas, ho Embaixadór Emiradus Árabes Unidus iha Indonézia no Embaixadór naun-rezidente iha Timor-Leste, Abdulla Salem Al Dhaheri, ba implementasaun “Projetu Alojamentu no Ekipamentu Sosiál ba Estudante Feto sira” iha Timor-Leste.

Serimónia ne’e hetan mós partisipasaun hosi Vise-Primeiru-Ministru no Ministru Defeza Austrália, Richard Donald Marles, membrus Governu, reprezentantes hosi instituisoins Estadu, korpu diplomátiku no bainaka internasionál sira.

Projetu ne’e prevee konstrusaun ba infraestrutura rezidensiál ida ne’ebé sei utiliza atu simu estudante universitáriu sira to’o 300 (atus tolu) hosi família vulneravel ne’ebé mai hosi munisípiu oioin iha país ne’e, ho objetivu atu apoia asesu ba ensinu superiór iha Dili, liuliu ba foin-sa’e sira ne’ebé hala’o estudu iha área sira hanesan siénsia, teknolojia, medisina, ekonomia no teknolojia informasaun.

Tuir Embaixadór Abdulla Salem Al Dhaheri, inisiativa ne’e reflete kompromisu Emiradus Árabes Unidus nian hodi apoia dezenvolvimentu sustentável, edukasaun no kooperasaun umanitária.

«Inisiativa importante ida-ne’e hetan orientasaun no apoiu ne’ebé boot hosi Sua Alteza Xeique Mohamed bin Zayed Al Nahyan, Prezidente Emiradus Árabes Unidus, ne’ebé nia lideransa vizionária kontinua fó importánsia boot hodi apoia dezenvolvimentu sustentável, edukasaun no kooperasaun umanitária iha mundu tomak.»

Prezidente Repúblika hateten katak projetu ne’e mosu tanba preokupasaun kona-ba kondisaun prekária ne’ebé hasoru hosi estudante feto timoroan barak ne’ebé muda mai Dili hodi kontinua sira-nia estudu universitáriu. Nia destaka mós katak kompleksu rezidensiál ne’e dezeña hanesan infraestrutura moderna ida, ne’ebé inkorpora solusaun teknolójika no ambientál, inklui utilizasaun enerjia solár, sistema rekolla no tratamentu ba udan-been, resiklajen ba bee-fo’er, no mós prinsípius ekonomia sirkulár nian.

Rezidénsia ne’e sei inklui biblioteka, sala estudu, refeitóriu, klínika no espasu verde, ho objetivu atu fornese kondisaun sira ne’ebé adekuadu ba dezenvolvimentu akadémiku no pesoál estudante sira nian.

 “Ohin loron esperansa no progresu ba feto foin-sa’e sira Timor-Leste nian. Edukasaun nu’udar arma ida ne’ebé iha liu podér atu muda mundu no, atu ita-nia oan-feto sira bele hetan susesu, sira tenke aprende iha ambiente ida ne’ebé seguru no dignu.”

Prezidente José Ramos-Horta destaka mós reforsu hosi relasoins bilaterais entre Timor-Leste ho Emiradus Árabes Unidus, no mós hato’o saudasaun ba intensaun EAU nian hodi harii futuru embaixada ida iha Dili.

Projetu ne’e tuir planu sei remata iha tinan 2027 no sei harii iha área ida ne’ebé besik ho Palásiu Prezidensiál Nicolau Lobato, no mós nu’udar parte hosi kooperasaun bilaterál entre Timor-Leste no Emiradus Árabes Unidus iha área edukasaun, kapasitasaun institusionál no dezenvolvimentu.