Sekretaria Estadu Konsellu Ministru organiza workshop ida kona-ba “Ezemplu sira Regulasaun Komunikasaun Sosiál nian iha Mundu”, iha kinta-feira, loron 14, fulan Abril, iha Hotél Arbiru, Dili.

Workshop ne’e loke ba profisionál sira hotu iha área ida ne’e hodi aprezenta ba sira ezemplu balun kona-ba regulamentu ba Komunikasaun Sosiál hosi país sira hanesan Indonézia, Portugal, Austrália, Filipinas, Brazil no Nova Zelándia.

Sekretáriu Estadu Polítika Enerjétika, Avelino Coelho, nu’udar Sekretáriu Estadu Interinu Konsellu Ministrus, iha ninia intervensaun hateten “Atu halo regulasaun ne’ebé mak di’ak ba meiu komunikasaun sosiál nian, iha referénsia tolu ne’ebé  mak sei diskute iha Workshop ne’e, mak hanesan, autoregulasaun, signifika Jornalista mak halo sira nia regulasaun rasik, ida fali mak ko-regulasaun, signifika Governu ka Estadu ho Jornalista sira mak halo regulasaun hodi regula atividade meiu komunikasaun sosiál nian no ida ikus liu mak Regulasaun, signifika katak Governu ka Estadu mak halo regulasaun ida hodi regula atividade sira iha meiu komunikasaun sosiál nian.”

Hafoin liu tiha diskusaun kle’an ida entre profisionál sira iha komunikasaun sosiál nian durante loron tomak iha workshop ne’e, hetan ninia konkluzaun hodi forma ekipa ida ne’ebé kompostu hosi, Mouzinho Lopes, Otélio Ote, Salvador Ximenes, Prezado Ximenes, Suzana Cardoso no Sofia Calado. Kria Ekipa ne’e atu halo análize ba lei subsidiária Indonézia nian, kona-ba Komunikasaun sosiál (Lei No. 40/1999) no esbosu lei komunikasaun sosiál nian ne’ebé iha hela meza Parlamentu Nasionál.

Partisipa iha Workshop ne’e mak hanesan, Sekretáriu Estadu Politika Enerjétika, Avelino Coelho, Diretór Jerál SECM, Victor Maia, Asesora Jurídíka ba Komunikasaun Sosiál iha SECM, Sofia Calado, Prezidente AJTL, Virgilio Guteres, Prezidente Press Club Timor-Leste, Paulino Quintas, Prezidente Sindikatu Jornalista Timor-Leste, Otelio Ote, Suzana Cardoso hosi TILPA, Prezado Ximenes hosi Asosiasaun Rádiu Komunitáriu, Expedito Dias Ximenes, Prezidente Interinu Konsellu Administrasaun RTTL, Nain empreza STL, Salvador Ximenes, Jorge Serrano, nain ba empreza Grupu Media Nasionál no konvidadu sira seluk.