Governu, liuhosi Ministériu Finansas no iha kolaborasaun ho ministériu relevante sira seluk, lansa prosesu Konsulta Públika nasionál ida hodi apoia preparasaun ba Orsamentu Jerál Estadu tinan 2027 (OJE 2027) nian, ho objetivu atu rekolle kontribuisaun hosi populasaun kona-ba prioridade dezenvolvimentu no prestasaun servisus públikus.

Prosesu ne’e ofisialmente hahú iha segunda-feira, loron 4 fulan-maiu tinan 2026, ho konsulta simultánea iha munisípiu Kovalima, Ermera no Lautein. Ohin, loron 11 fulan-maiu, konsulta kontinua iha Munisípiu Likisá no sei kontinua iha munisípiu sira-seluk, inklui Ataúro no Rejiaun Administrativa Espesiál Oe-Kusi Ambenu (RAEOA).

Inisiativa ne’e ho objetivu atu halibur sidadaun sira-nia opiniaun no perspetiva kona-ba dezafiu prinsipál sira dezenvolvimentu nian, lakuna iha prestasaun servisus públikus, no mós área prioritáriu sira intervensaun nian, atu nune’e bele garante katak polítika públika no desizaun orsamentál sira ba tinan 2027 reflete nesesidade loloos komunidade sira-nian.

Konsulta públika sei hala’o hosi loron 4 to’o loron 15 fulan-maiu tinan 2026, no sei inklui partisipasaun reprezentante sira hosi komunidade lokál, organizasaun sosiedade sivíl, ema ho defisiénsia, foin-sa’e sira, setór privadu, veteranus no reprezentante relijiozu sira.

Prosesu ne’e kombina diskusaun grupu fokál no inkéritu (levantamentu), ho objetivu atu halibur dadus konsistente no bazeia ba evidénsia sira ne’ebé bele apoia planeamentu no mós definisaun prioridade governu nian sira ba ezersísiu orsamentál tuirmai.

Tuir Ministériu Finansas, konsulta públika ida-ne’e la’ós de’it ho karakter konsultivu, maibé iha mós dimensaun prátika no orientada ba asaun, no prevee katak kontribuisaun sira ne’ebé rekolle ona sei analiza no integra iha prosesu planeamentu no preparasaun OJE tinan 2027 nian.

Governu husu populasaun nia partisipasaun ativa iha territóriu nasionál tomak, hodi insentiva sidadaun sira atu kontribui ba prosesu definisaun prioridade nasionál.