Ministru Prezidénsia Konsellu Ministrus, Agio Pereira, hala’o sorumutu  ho Diretór Tony Blair Institute (TBI) nian iha Timor-Leste, Michael Purdon, hodi ko’alia kona-ba asuntu sira ne’ebé relasiona ho transformasaun dijitál, intelijénsia artifisiál (IA), siberseguransa no fortalesimentu institusionál. 

Durante sorumutu ne’e, Tony Blair Institute aprezenta esperiénsia internasionál sira kona-ba apoiu ba governu iha formulasaun polítika públika  no implementasaun solusaun dijitál, inklui iha área intelijénsia artifisiál no modernizasaun administrativa.

Ministru Agio Pereira subliña kona-ba  nesesidade atu hametin infraestrutura, kapasidade institusionál no literasia dijitál hodi hasoru dezafiu sira ne’ebé relasiona ho dijitalizasaun nasaun nian ne’ebé aumenta ba beibeik. Iha kontestu ida-ne’e, nia destaka katak kombate siberkrime agora daudaun hanesan prioridade ida hosi Governu, ne’ebé hateten katak lejizlasaun nasionál kona-ba asuntu ida-ne’e iha hela faze preparasaun ikus nian.

Governante no reprezentante TBI nian mós ko’alia kona-ba risku sira ne’ebé relasiona ho dezinformasaun, protesaun ba infraestrutura krítika sira no seguransa baze-dadus governu nian, no mós nesesidade hodi hametin sistema nasionál atu hatán ba insidente sibernétiku.

Iha sorumutu ne’e ko’alia mós kona-ba importánsia husi preparasaun dijitál Timor-Leste nian iha kontestu adezaun ba ASEAN, inklui dezenvolvimentu kapasidade téknika no reforsu konektividade dijitál iha munisípiu sira.

Sorumutu ne’e konklui ho énfaze ba nesesidade atu kontinua investe iha kapasitasaun institusionál, inkluzaun dijitál no preparasaun nasionál ba dezafius ne’ebé relasiona ho teknolojia foun sira no intelijénsia artifisiál, tanba transformasaun dijitál nu’udar oportunidade ida no mós vulnerabilidade ida.