Ohin loron 11 fulan-maiu tinan 2026, halo gravasaun iha Palásiu Governu, Dili, epizódiu foun hosi programa “Página do Governo” ho partisipasaun hosi Sekretáriu Estadu Terras no Propriedades, Jaime Xavier Lopes, ne’ebé ko’alia kona-ba polítika públika no mós dezafiu no prioridade prinsipál sira iha setór terras no propriedades nian. 
Durante entrevista, aborda kestaun sira ne’ebé relasiona ho vizaun Governu nian ba jestaun rai ne’ebé transparente no efikás, garante sidadaun sira-nia direitu ba propriedade, dezafius ne’ebé relasiona ho propriedades hosi tempu portugés no indonéziu, prosesu regularizasaun no sertifikasaun ba rai, no mós mekanizmus transparénsia iha administrasaun fundiária (kadastru) nian.
Konversa ne’e foka mós kona-ba mekanizmu mediasaun iha disputa rai, kontributu regularizasaun fundiária (kadastru) nian ba seguransa ai-han no dezenvolvimentu sustentável ba komunidade rurál sira, nune’e mós impaktu hosi rejistu legál terras no propriedades atu atrai investimentu privadu no dezenvolvimentu ekonómiku nasionál.
Programa “Página do Governo” promove hosi Gabinete Portavós Governu, ne’ebé lidera hosi Ministru Prezidénsia Konsellu Ministrus, Agio Pereira, programa ne’e prodús iha parseira ho RTTL no mídia nasionál sira, ho objetivu atu reforsa transparénsia governativa, prestasaun kontas no asesu sidadaun sira nian ba informasaun kona-ba desizaun no polítika públika prinsipál sira Ezekutivu nian.
Programa ne’e, konta ho Nélia Chaves nu’udar entrevistadora no ho Ika Moniz hanesan produtora ezekutiva, ne’ebé sai hanesan espasu ida ba diálogu institusionál, ne’ebé foka liu ba interese públiku. Programa “Página do Governo” ne’e grava hosi RTTL, no mós hetan apoiu tékniku hosi ekipa mídia Gabinete Primeiru-Ministru, Prezidénsia Konsellu Ministrus, no gabinete hosi membru Governu ne’ebé hetan entrevista.
Epizódiu ho Sekretáriu Estadu Terras no Propriedades sei fó sai iha tempu badak iha RTTL no mídia sosiál sira.
Programa hotu-hotu ne’ebé tranzmite ona disponivel iha kanál YouTube @PCMPAGINADOGOVERNOTIMORLESTE