Timor-Leste no Brunei Darussalam hamutuk hala’o Forum Emprezariál entre Brunei Darussalam no Timor-Leste iha loron 5 fulan-maiu tinan 2026, iha Jerudong. Inisiativa ne’e ho objetivu atu hametin relasaun ekonómika bilaterál, promove oportunidade investimentu, no mós aprofunda kooperasaun entre setór públiku no privadu nasaun rua ne’e nian. 
Eventu ne’e hetan partisipasaun husi Vise-Primeiru-Ministru, Ministru Koordenadór Asuntus Ekonómikus no Ministru Turizmu no Ambiente, Francisco Kalbuadi Lay, ne’ebé reprezenta Primeiru-Ministru, Kay Rala Xanana Gusmão, no Ministru Gabinete Primeiru-Ministru no mós Segundu Ministru Finansas no Ekonomia Brunei Darussalam nian, Dato Seri Setia Dr. Awang Haji Mohd Amin Liew bin Abdullah.
Iha nia diskursu, Ministru Amin Liew Abdullah destaka reforsu relasaun diplomátika entre nasaun rua dezde 2002 no mensiona interese hodi promove oportunidade foun sira ba kooperasaun ekonómika, inklui ba empreza ki’ik no médiu sira, ho hanoin atu habelar parserias no integrasaun iha kadeia valór rejionál.
Francisco Kalbuadi Lay agradese ba Brunei Darussalam no Estadu-Membru ASEAN sira seluk ne’ebé fó apoiu ba Timor-Leste nia prosesu adezaun plena ba ASEAN, no mós aprezenta prioridades ekonómikas no dezenvolvimentu nasionál.
Vise-Primeiru-Ministru afirma katak “Timor-Leste nakloke ba negósiu” no destaka reforma sira ne’ebé hala’o daudaun hodi diversifika ekonomia nasionál no hamenus dependénsia ba setór petrolíferu. Nia mós mensiona kreximentu ne’ebé hein hosi ekonomia naun-petrolífera iha tinan 2025 no mós salienta nesesidade atu hametin investimentu no parseria internasionál hodi aselera dezenvolvimentu ekonómiku.
Vise-Primeiru-Ministru mós aprezenta oportunidade investimentu iha setór sira ne’ebé konsidera nu’udar prioridade hosi Governu, inklui agrikultura, peskas, turizmu, enerjia no infraestruturas. Iha setór turizmu, nia destaka potensiál ne’ebé relasiona ho biodiversidade tasi nian, paizajen naturál, no mós dezenvolvimentu infraestruturas no konektividade foun sira.
Iha setór enerjétiku, Francisco Kalbuadi Lay mensiona Timor-Leste nia interese hodi aprofunda kooperasaun rejionál, inklui ho Brunei Darussalam, iha área sira ne’ebé iha relasaun ho petróleu, gás, no enerjia renovável, no mós iha dezenvolvimentu projetus enerjétikus integradus.
Governante ne’e mós aprezenta kona-ba reforma legál no regulatóriu sira ne’ebé adota ona hodi hadi’a ambiente negósiu, inklui lejizlasaun kona-ba investimentu privadu, konkorrénsia, insolvénsia, no promosaun esportasaun, no mós medida sira hodi simplifika prosedimentus administrativus no fasilita investimentu.
Iha sorumutu ne’e, hala’o sesaun diálogu emprezariál ida ne’ebé ho objetivu atu identifika área kooperasaun foun no hametin relasaun ekonómika entre nasaun rua ne’e.
Durante forum ne’e, asina memorandu entendimentu oioin, inklui akordu sira iha setór kuidadu saúde no instrumentus kooperasaun emprezariál nian. Prezidente Autoridade Turizmu Timor-Leste, Virgílio Smith, mós asina memorandu entendimentu ho emprezas husi Brunei Darussalam ba kooperasaun iha promosaun turizmu, investimentu no dezenvolvimentu destinu turístiku.
Forum ne’e halibur reprezentantes governu nian, emprezárius no investidór sira hosi nasaun rua ne’e no mós tau-hamutuk esforsus hodi promove kooperasaun ekonómika rejionál hafoin Timor-Leste nia adezaun plena ba ASEAN.