Ministru Prezidénsia Konsellu Ministru, Agio Pereira, ohin, loron 7 fulan-maiu, 2026, iha Palásiu Governu Dili hasoru malu ho Embaixadora Austrália ba Asuntu Sibernétiku no Teknolojia Krítika, Jessica Hunter, hodi ko’alia kona-ba medida sira ne’ebé relasiona ho siberseguransa, protesaun dijitál, no resposta ba risku sira iha siberespasu. 

Sorumutu ne’e konta mós ho partisipasaun hosi Diretór-Jerál Servisu Nasionál Intelijénsia Estratéjiku (SNIE), Longuinhos Monteiro, reprezentantes husi Embaixada Austrália iha Timor-Leste, inklui Embaixadora Caitlin Wilson, no asesora sira Prezidénsia Konsellu Ministrus nian.

Sorumutu ne’e hala’o iha ámbitu “Parseria Foun ba Era Foun” (“Nova Parceria para uma Nova Era”), ne’ebé estabelese entre Governu Timor-Leste no Austrália, ne’ebé prevee kooperasaun bilaterál iha área estratéjiku oioin, inklui siberseguransa.

Durante sorumutu, delegasaun austrália nian aprezenta rezultadu hosi análize ba lakuna no roteiru estratéjiku hodi reforsa kapasidade sibernétiku Governu Timor-Leste nian, ne’ebé elabora/dezenvolve ona hosi konsultora australiana Scyne Advisory. Dokumentu ne’e inklui medida no solusaun oioin ne’ebé relasiona ho reforsu institusionál, koordenasaun nasionál, no hadi’a kapasidade ba prevensaun no resposta ba risku sibernétiku sira.

Iha sorumutu ne’e, Ministru Prezidénsia Konsellu Ministrus esplika katak, parte boot ida hosi área prioridade, medida no solusaun sira ne’ebé identifika ona iha relatóriu ne’ebé aprezenta prevee/tama ona iha pakote siberseguransa nasionál ne’ebé Governu Timor-Leste daudaun ne’e prepara.

Pakote lejizlativu ne’ebé dezenvolve hela, prevee kriasaun diploma lubun ne’ebé ho objetivu atu hametin kuadru legál no institusionál nasionál iha área ida-ne’e, inklui definisaun ba Estratéjia Siberseguransa Nasionál ida no kriasaun rejime jurídiku sira ne’ebé relasiona ho siberespasu, servisu dijitál sira, siberkrime, no protesaun ba denunsiante sira infrasaun nian.

Inisiativa ne’e hakarak reforsa seguransa rede no sistema informasaun nian, proteje infraestrutura krítika no servisu esensiál sira, hadi’a kapasidade prevensaun no resposta ba insidente sibernétiku sira no promove utilizasaun ambiente dijitál ne’ebé seguru no responsável liu hosi sidadaun, empreza no instituisaun públika sira. Pakote ne’e mós prevee mekanizmu koordenasaun estratéjiku no kooperasaun nasionál no internasionál iha área ne’e.

Embaixadora Jessica Hunter mós fahe Austrália nia experiénsia hodi hatán ba risku sibernétiku globál no medida sira ne’ebé adopta ona hodi reforsa reziliénsia dijitál.