Edisaun ba da-21 hosi programa “Página do Governo”, ho partisipasaun hosi Ministra Solidariedade Sosiál no Inkluzaun, Verónica das Dores, sei transmite iha sesta-feira ne’e, loron 8 fulan-maiu tinan 2026, tuku 8 kalan, iha Rádiu no Televizaun Timor-Leste (RTTL) no iha rede sosiál sira.

Durante entrevista ne’e, Ministra Verónica das Dores sei aprezenta prioridades prinsipál s Ministériu Solidariedade Sosiál no Inkluzaun nian, hodi destaka programa asisténsia sosiál, protesaun sosiál no inkluzaun sosiál, ne’ebé dirije liuliu ba grupu sira ne’ebé vulneravel liu, inklui labarik, ferik-katuas, ema ho defisiénsia, vítima violénsia doméstika no família sira ne’ebé iha situasaun vulneravel.

Entrevista ne’e aborda mós implementasaun programa Bolsa da Mãe Kondisionál, kritériu identifikasaun família benefisiária, reforsu apoiu sosiál no umanitáriu, konstrusaun uma solidariedade, apoiu espesífiku ba sidadaun sira ne’ebé presiza, no mós medidas reintegrasaun komunitária ba vítima violénsia no kazu sosiál kompleksu sira seluk.

Programa “Página do Governo” promove hosi Gabinete Portavós Governu, ne’ebé lidera hosi Ministru Prezidénsia Konsellu Ministrus, Agio Pereira, programa ne’e prodús iha parseira ho RTTL no mídia nasionál sira, ho objetivu atu reforsa transparénsia governativa, prestasaun kontas no asesu sidadaun sira nian ba informasaun kona-ba desizaun no polítika públika prinsipál sira Ezekutivu nian.

Programa ne’e konta ho Nélia Chaves nu’udar aprezentadora no ho Ika Moniz hanesan produtora ezekutiva no mós hetan apoiu tékniku hosi ekipa mídia Prezidénsia Konsellu Ministrus nian, hosi Gabinete Primeiru-Ministru no gabinete hosi membru Governu ne’ebé hetan entrevista. “Página do Governo” sai hanesan espasu ida ba diálogu institusionál, ne’ebé foka liu ba interese públiku no hakbesik Governu ba sidadaun sira.

Governu konvida sidadaun hotu-hotu atu akompaña “Página do Governo” edisaun foun ida-ne’e iha sesta-feira, loron 8 fulan-maiu tinan 2026, tuku 8 kalan, iha RTTL no mídia sosiál sira.

Programa hotu-hotu ne’ebé tranzmite ona disponivel iha kanál YouTube @PCMPAGINADOGOVERNOTIMORLESTE