Timor-Leste no Indonézia konklui ona ronda datoluk hosi negosiasaun formál kona-ba fronteiras marítimas, ne’ebé hala’o iha Singapura hosi loron 27 to’o loron 29 fulan-abríl tinan 2026, hodi kontinua prosesu ne’ebé hahú ona iha tinan 2025, ho ronda anteriór sira iha Dili ho Jogjakarta.  

Delegasaun Timor-Leste nian xefia hosi Elizabeth Exposto, Xefe Gabinete Primeiru-Ministru, Kay Rala Xanana Gusmão, no Diretora Ezekutiva Gabinete Fronteiras terrestres no Marítimas. Delegasaun Indonézia nian lidera hosi Embaixadór Amrih Jinangkung, Embaixadór Indonézia ba Olanda no eis Diretór-Jerál ba Assuntus Tratadus Internasionais hosi Ministériu Negósius Estranjeirus.

Durante loron tolu serbisu nian, delegasaun rua ne’e mantein diálogu ida ne’ebé konstrutivu, ne’ebé permite hetan progresu iha prosesu negosiasaun. Parte rua hametin kompromisu hodi kontinua serbisu ho objetivu atu hetan solusaun ida ne’ebé ekuitativa no parte rua ne’e bele aseita.

Ronde dahaat negosiasaun nian prevee ba fulan-agostu tinan 2026, iha Indonézia.

Molok ne’e, Timor-Leste konklui ona prosesu delimitasaun permanente ba fronteiras marítimas ho Austrália, iha ámbitu mekanizmu konsiliasaun bazeia ba Konvensaun Nasoins Unidas nian kona-ba Direitu Marítimu, ne’ebé nia rezultadu mak asinatura tratadu bilaterál ida iha tinan 2018, ne’ebé tuirmai ratifika iha tinan 2019.