Governu Timor-Leste

Ministériu Administrasaun Estatál no Ordenamentu Territoriál (MAEOT) ho Provedoria Direitu Umanu no Justisa (PDHJ)  iha sesta-feira semana kotuk loron 8 fulan Abril 2011, iha salaun PDHJ nian, asina Nota intendimentu ida hodi fó kapasitasaun ba lider komunitáriu sira kona-ba Direitu Umanu no mediasaun ba problema.

MAEOT liu hosi Diresaun Nasionál apoiu Administrasaun ba Suku asina nota intendimentu hamutuk ho Diresaun Direitu Umanu PDHJ nian  ne’e atu servisu hamutuk hodi  fó kapasitasaun ba lider komunitáriu sira kona-ba direitu umanu nian. Kapasitasaun ne’e atu oinsá bele rezolve problema ne’ebé mosu iha komunidade sira nia le’et liu hosi dalan mediasaun.

Iha okaziaun ne’e, Provedór Direitu Umanu no Justisa, Sebastiao Dias Ximenes, hateten katak “PDHJ iha kna’ar ida atu promove duni Direitu Umanu, tan ne’e liu hosi nota intendimentu ne’e bele fó kapasitasaun no koñesimentu ba lider komunitáriu sira kona-ba Direitu Umanu no oinsá halo mediasaun ba problema ne’ebé mak mosu iha komuidade sira nia le’et, tan buat rau ne’e importante tebes.”

Formadór sira iha formasaun ne’e mai hosi PDHJ no kapasitasaun ne’e sei hala’o durante tinan ida nia laran.