Sorumutu Konsellu Ministrus loron 30 fulan-abril tinan 2026

Konsellu Ministrus hala’o sorumutu iha Palásiu Governu, Dili, no tuir projetu ne’ebé aprezenta hosi Ministru Agrikultura, Pekuária, Peskas no Florestas, Marcos da Cruz, delibera hodi autoriza despeza ne’ebé relasiona ho kontratu konstrusaun ba projetu irrigasaun Laueli, iha Munisípiu Ermera, ho montante besik dolar amerikanu millaun 10,25.

****

Tuir proposta husi Ministru Petróleu no Rekursus Minerais, Francisco da Costa Monteiro, Konsellu Ministrus delibera hodi autoriza despeza ba selebrasaun Kontratu Subvensaun ida entre Ministériu Petróleu no Rekursus Minerais ho TIMOR GAP, EP, ho montante dolar amerikanu millaun 14 ba tinan 2026.

Despeza ne’e mai hosi dotasaun orsamentál hosi Ministériu Petróleu no Rekursus Minerais, iha ámbitu Programa A17, ne’ebé ho objetivu atu “Dezenvolve Polítika no Prátika Di’ak iha Indústria hodi Garante Partisipasaun Másima Timoroan sira-nian iha Atividade Setór ne’e nian”.

****

Ministru Petróleu no Rekursus Minerais halo mós aprezentasaun ida kona-ba Memorandu Entendimentu ho Governu Brunei Darussalam, ho objetivu atu hametin kooperasaun iha setór enerjétiku, ne’ebé sei asina iha semana oin.

Entendimentu ida-ne’e estabelese kuadru kolaborasaun entre nasaun rua ne’e, ne’ebé foka ba fahe koñesimentu, dezenvolvimentu kapasidade téknika, no promosaun oportunidade investimentu, liuliu iha área petróleu no gás.

Kooperasaun ne’ebé prevee ona inklui atividade formasaun no fahe esperiénsia, hala’o estudu konjuntu sira iha área peskiza, esplorasaun, dezenvolvimentu no produsaun nian, no mós troka prátika di’ak kona-ba polítika enerjétika. Akordu ne’e mós fó dalan ba dezenvolvimentu hosi inisiativa sira seluk ne’ebé sei define hamutuk hosi parte rua.

Hafoin asinatura, Ministériu Petróleu no Rekursus Minerais sei garante implementasaun dispozisaun sira iha memorandu ne’e, iha koordenasaun ho entidades kompetente no tuir lejizlasaun nasionál aplikavel.

***

Ikusliu, Vise-Ministru ba Fortalesimentu Institusionál Saúde, José dos Reis Magno, halo aprezentasaun ida kona-ba Memorandu Entendimentu ho Governu Brunei Darussalam, relasiona ho kooperasaun iha área saúde,  ne’ebé sei asina iha semana oin.

Memorandu Entendimentu ida-ne’e ho objetivu prinsipál atu estabelese kuadru kooperasaun ida entre nasaun rua ne’e, bazeia ba respeitu no benefísiu mútuu, ho hanoin atu hametin servisu saúde no dezenvolve setór ne’e.

Área prinsipál sira ba kooperasaun maka servisus saúde, prevensaun no kontrolu moras, dezenvolvimentu rekursus umanus no mós reforsu infraestrutura ba ospitál sira. Kooperasaun ne’e bele inklui fahe informasaun no koñesimentu, troka espesialista sira, formasaun téknika, hala’o semináriu, no mós dezenvolve projetu konjuntu. REMATA