Timor-Leste partisipa iha Simeira Dijitál Xina ba dala 9, ne’ebé hala’o iha loron 29 no 30 fulan-abríl tinan 2026, iha Fuzhou, Provínsia Fujian, Repúblika Populár Xina, liuhosi nia Delegadu iha Sekretariadu Permanente Forum ba Kooperasaun Ekonómika no Komersiál entre Xina no País Lian Portugés sira (Forum Macau), António Ramos da Silva. 

Simeira ne’e halibur reprezentante governamentál, espesialista no entidade sira hosi setór teknolojia nian, ho objetivu atu aprezenta progresu sira iha área dijitál, promove inovasaun, no hametin kooperasaun internasionál. Edisaun 2026 ne’e hala’o ho tema “Aselera inovasaun no dezenvolvimentu iha teknolojia dijitál no mós hakle’an konstrusaun Xina Dijitál”.

Programa ne’e inklui eventu diálogu no interkámbiu 50 resin, ne’ebé foka liu ba teknolojia foun no aprezentasaun rezultadus tékniku, inklui inisiativas ne’ebé dezenvolve hosi instituisaun akadémika no empreza sira iha setór ne’e.

Iha loron dahuluk, reprezentante timoroan partisipa iha forum paralelu ida ne’ebé dedika ba ekonomia dijitál no vizita pavillaun espozisaun. Iha loron 30 fulan-abríl, planeia ona vizita ba empreza teknolójika oioin, ho objetivu atu hatene kona-ba solusaun no aplikasaun sira iha área transformasaun dijitál nian.

Partisipasaun Timor-Leste nian halo parte iha prioridade nasionál ba dezenvolvimentu setór dijitál, liuliu iha ámbitu planu estratéjiku “Timor Dijitál 2032″ no preparasaun Estratéjia Transformasaun Dijitál 2026–2036, ne’ebé ninia konsulta públika hala’o iha loron 16 no 17 fulan-abríl, ne’ebé promove hosi Ministériu Transportes no Komunikasoins.