Ohin, loron 28 fulan-abríl tinan 2026, grava epizódiu foun ida hosi programa “Página do Governo” iha Palásiu Governu, Dili, ne’ebé marka, ba dala uluk, partisipasaun hosi bainaka sira ne’ebé la’ós membru Ezekutivu. Edisaun ne’e konta ho partisipasaun husi Diretór Ezekutivu Fundu Monetáriu Internasionál (FMI), André Roncaglia, no Governadór Banku Sentrál Timor-Leste (BCTL, sigla iha lian portugés), Hélder Lopes, iha entrevista ida ne’ebé ho objetivu atu esplora oinsá dinámika globál artikula ho prioridade polítika nasionál sira, liuliu iha hametin reziliénsia, garante estabilidade makroekonómika no promove transformasaun estruturál ba tempu naruk. 

Durante entrevista, aborda kestaun sira relasiona ho impaktu hosi inserteza jeoekonómika globál ba ekonomia ki’ik sira, ne’ebé dependente ba importasaun hanesan Timor-Leste, inklui efeitu hosi folin enerjia no ai-han ne’ebé instavel, kondisaun finanseira internasionál, no mós tensaun jeopolítika. Programa ne’e mós foka ba nesesidade diversifikasaun ekonómika, tranzisaun husi modelu ida ne’ebé depende ba reseita petrolífera ba kreximentu ida ne’ebé sustentável no inkluzivu liu, nune’e mós knaar husi sistema finanseiru hodi apoia setór privadu no dezenvolvimentu ekonómiku.

Diskute mós asuntu sira ne’ebé relasiona ho jestaun Fundu Petrolíferu, polítika fiskál, no estabilidade makroekonómika, inklui dezafiu sira ne’ebé asosiadu ho ekonomia ida ne’ebé domina ho dolar no mós opsaun polítika ne’ebé disponivel atu hametin reziliénsia ekonómika, kontrola presaun inflasionista no garante sustentabilidade finansas públikas.

Programa “Página do Governo” promove hosi Gabinete Portavós Governu, ne’ebé lidera hosi Ministru Prezidénsia Konsellu Ministrus, Agio Pereira, programa ne’e prodús iha parseira ho RTTL no mídia nasionál sira, ho objetivu atu reforsa transparénsia governativa, prestasaun kontas no asesu sidadaun sira nian ba informasaun kona-ba desizaun no polítika prinsipál sira Ezekutivu nian.

Programa ne’e konta ho Nélia Chaves nu’udar entrevistadora no ho Ika Moniz hanesan produtora ezekutiva, sai hanesan espasu ida ba diálogu institusionál, ne’ebé foka liu ba interese públiku no hodi garante asesu populasaun nian ba asaun no desizaun prinsipál sira Ezekutivu nian. Programa ne’ebé grava hosi RTTL, hetan mós apoiu tékniku hosi ekipa mídia Gabinete Primeiru-Ministru, Prezidénsia Konsellu Ministrus, no hosi gabinete membru governu ne’ebé hetan entrevista.

Epizódiu ohin nian, ho responsavel hosi FMI no BCTL, sei fó sai iha tempu badak iha RTTL no rede sosiál sira.

Programa hotu-hotu ne’ebé tranzmite ona disponivel iha kanál YouTube @PCMPAGINADOGOVERNOTIMORLESTE