Iha loron 15, fulan Abril, Ministra Finansa to’o iha kapitál Estadus Unidus Amérika, Washington D.C., hodi hola parte iha Sorumutu Públiku ida kona-ba g7+.

Iha loron 16, fulan Abril, Emília Pires sei hola parte iha sorumutu Primavera (Spring Meetings) Banku Mundiál no Fundu Monetáriu Internasionál (FMI) nian, ne’ebé sei hala’o entre loron 11 no 16 fulan Abril, nu’udar sorumutu hirak ne’ebé mak marka tiha ona ho membru FMI, Banku Mundiál no Ministru Finansa hosi Nasaun sira seluk nian.
Tinan-tinan, durante primavera, reprezentante atus-ba-atus hosi parte governu nian, setór privadu, sosiedade sivil, jornalista no observadór sira seluk hola parte iha sorumutu hirak Banku Mundiál no FMI nian. Pontu aas sorumutu sira ne’e nian mak sorumutu konjuntu Komité Monetáriu no Finanseiru FMI no Komité Dezenvolvimentu Banku Mundiál nian hodi diskute kona-ba progresu traballu nian ne’ebé instituisaun rua ne’e dezenvolve. Tama mós iha ajenda semináriu, sorumutu rejionál, konferénsia ba imprensa no enventu sira seluk ne’ebé reflete kona-ba ekonomia globál, dezenvolvimentu internasionál no merkadu finanseiru iha mundu.

Iha loron 17 no 18 fulan Abril, Ministra Finansa sei hola parte, iha sede FMI nian, iha Konferénsia ida kona-ba Mobilizasaun ba Rekursu sira iha País sira ne’ebé iha hela Dezenvolvimentu nia laran.

Iha loron 18 fulan Abril, iha lorokraik, Ministra sei hahú nia viajen fila fali mai Timor-Leste, no sei to’o iha loron 21 fulan Abril.