Ministru Prezidénsia Konsellu Ministrus, Agio Pereira, hala’o sorumutu ho Diretór Ezekutivu Sentru Nasionál Chega IP, Hugo Maria Fernandes, no membru sira Grupu Traballu ba Prosesu Reparasaun Nasionál, hodi analiza serbisu ne’ebé la’o hela iha polítikas reparasaun ba vítima violasaun direitus umanus no prosesu rekonsiliasaun nasionál. 

Sentru Nasionál Chega IP nu’udar institutu públiku ida ne’ebé harii husi Dekretu-Lei n. 48/2016, ho misaun atu prezerva memória pasadu no promove direitus umanus, liuhusi implementasaun rekomendasaun husi Komisaun Akollimentu, Lia-Loos no Rekonsiliasaun (CAVR, sigla iha lian portugés) no mós Komisaun Lia-Loos no Amizade (CVA, sigla iha lian portugés).

Durante sorumutu ne’e, aprezenta serbisu ne’ebé hala’o ona iha trimestre dahuluk, inklui realizasaun ba konsulta públika kona-ba ezbosu polítika no lejizlasaun iha área ida-ne’e, ne’ebé hala’o iha munisípiu Dili, Aileu, Bobonaru no Vikeke.