Ministru Agrikultura, Pekuária, Peskas no Floresta, Marco da Cruz, lidera delegasaun Timor-Leste iha Konferénsia Rejionál Organizasaun Nasoins Unidas nian ba Alimentasaun no Agrikultura (FAO) ba Ázia no Pasífiku (APRC38) ba dala 38, iha ne’ebé nia aprezenta prioridade nasionál sira ba transformasaun sistema agroalimentár no reforsa kompromisu nasionál ba seguransa ai-han. Konferénsia ne’e hala’o hosi loron 20 to’o 24 fulan-abrabrílil tinan 2026, iha Bandar Seri Begawan, Brunei Darussalam. Sorumutu Altu Funsionáriu hala’o iha loron 20 to’o 22 fulan-abríl, tuir fali ho Sesaun Ministeriál iha loron 23 no 24 fulan-abríl. 

APRC38 halibur reprezentante hosi nasaun 46 iha rejiaun Ázia-Pasífiku hodi diskute polítika no estratéjia sira relasiona ho seguransa ai-han, dezenvolvimentu agríkola sustentável, no mós reziliénsia hosi sistema agroalimentár, iha kontestu ida ne’ebé marka ho dezafius hanesan inseguransa ai-han, mudansa klimátika, instabilidade merkadu nian no presaun jeopolítika.

Iha ninia diskursu, Ministru destaka katak, tanba agrikultura mak baze ba ekonomia nasionál, Timor-Leste fó prioridade ba reforsu reziliénsia klimátika, promosaun nutrisaun no sustentabilidade, no mós hadi’a konektividade merkadu nian. Iha kontestu ida-ne’e, nia mensiona investimentu iha ai-horis ne’ebé reziliente, jestaun rekursu ídriku, inklui barrajen no sistema irrigasaun, promosaun agrikultura orgánika, no mós reforsu infraestrutura rurál hodi fasilita distribuisaun produsaun no hamenus prejuízu.

Ministru subliña mós presiza reforsa kapasidade nasionál hodi hatán ba dezafiu estruturál sira iha setór ne’e, inklui limitasaun finanseira no téknika, hodi destaka importánsia hosi apoiu internasionál, transferénsia teknolojia no mekanizmu finansiamentu inovativu atu aselera transformasaun agríkola.

Iha ámbitu meza redonda ministeriál kona-ba abordajen “Saúde Ida de’it” no Programa Parseria Globál ba Moras Animál Transfronteirisa (GPP-TAD), Marco da Cruz salienta katak prosimidade entre komunidade rurál no animál sira iha Timor-Leste ezije abordajen integrada ida ba prevensaun no kontrolu moras. Nia defende atu reforsa sistema vijilánsia, servisu veterináriu no kooperasaun rejionál, ho hanoin atu proteje saúde animál no mós saúde públika.

Durante konferénsia ne’e, delegasaun Timor-Leste partisipa mós iha sesaun sira ne’ebé ko’alia kona-ba inovasaun ba seguransa ai-han, investimentu iha sistema agroalimentár, ekonomia azúl no integrasaun rejionál, no mós hala’o enkontru bilaterál ho parseiru internasionál sira hodi esplora oportunidade ba kooperasaun iha setór agrikultura, peskas, pekuária no florestas.