Governu Konstitusionál IX informa katak serimónia funerál ba Ministru Ensinu Superiór, Siénsia no Kultura, José Honório da Costa Pereira Jerónimo, hala’o ohin, loron 24 fulan-abríl tinan 2026, iha munisípiu Likisá, ne’ebé sei halibur membru família, membru Governu, autoridade, kolega no sidadaun sira hodi fó omenajen no despedida ikus.

Serimónia hahú iha tuku 3 lokraik, ho saída hosi rezidénsia família nian, iha Ekali, Maubara, diresaun ba Igreja São João de Brito, iha Likisá, iha ne’ebé misa solene sei hala’o iha tuku 3:30 lokraik. Funerál sei hala’o iha tuku 5 lokraik, besik rezidénsia família nian, iha Ekali, tuir mai ho jantár solidariedade ida ho família enlutada iha tuku 6 lokraik iha fatin hanesan. 

Iha mensajen ho lian Portugés hosi Primeiru-Ministru, Kay Rala Xanana Gusmão, ba família enlutada hakerek: “Foi, com enorme surpresa e em solidariedade com a imensa tristeza da família enlutada, rogamos a Deus que receba o Dr. José Honório da C. P. Jerónimo no seu reino! Um grande abraço, Ministro! Descanse em paz, entre os resplendores da luz perpétua!”.

Vise-Primeiru-Ministru Mariano Assanami Sabino hateten: “Ha’u sente lakon tebes lider Vizionáriu ida, la’ós Governu de’it mak lakon, la’ós de’it Partidu Demokrátiku mak lakon,  maibé povu Timor-Leste lakon ema matenek ida”.

Ministru Prezidénsia Konsellu Ministrus no Portavós Governu, Agio Pereira, hato’o ninia “tristeza boot ba José Honório da Costa Pereira Jerónimo nia mate, ne’ebé husik hela kontribuisaun importante ida ba dezenvolvimentu ensinu superiór iha Timor-Leste no reforsu instituisaun akadémika nasionál sira, ne’ebé dedika ona ninia vida ba servisu públiku, edukasaun no dezenvolvimentu nasionál.” Nia hatutan tan katak “Governu hato’o ninia sentida kondolénsia sinsera ba família enlutada, amigu no timoroan sira hotu iha momentu lutu ida-ne’e”. 

Iha votu pezar ne’ebé aprova hosi Konsellu Ministrus, liuhosi Rezolusaun Governu n. 27/2026, loron 22 fulan-abríl, Governu “hato’o ninia kondolénsia kle’an  ba falesimentu  husi Sua Exelénsia Ministru Ensinu Superiór, Siénsia no Kultura, José Honório da Costa Pereira Jerónimo, Sidadaun timoroan ho méritu rekoñesidu, destaka ninia dedikasaun públika tanba ninia kompromisu ba dezenvolvimentu sistema ensinu superiór, promosaun koñesimentu no valorizasaun kapitál umanu nasionál, tantu nu’udar atuál membru Governu no molok ne’e iha Universidade Nacional Timor Lorosa’e”.

Rezolusaun ne’e mós hateten katak “ninia vizaun estratéjika no kompromisu halo nia bele reforsa kualidade instituisaun ensinu superiór sira, promove kooperasaun akadémika internasionál, no mós habelar oportunidade formasaun avansada ba sidadaun timoroan sira” no katak “ninia mate nu’udar lakon ida ba Governu, ba komunidade akadémika no sientífika, no mós ba povu timoroan tomak.

José Honório da Costa Pereira Jerónimo moris iha Bazartete, Munisípiu Likisá, iha loron 15 fulan-fevereiru tinan 1973. Hasai lisensiatura iha Estudu Dezenvolvimentu iha tinan 2001, iha Institutu Teknolojia no Siénsia Mandala, Indonézia, no remata mestradu iha área ne’ebé hanesan iha tinan 2010, iha Universitas Kristen Satya Wacana, Salatiga, Indonézia.

Nia ezerse funsaun akadémika iha Universidade Nasionál Timor Lorosa’e (UNTL) dezde 2001, iha ne’ebé nia okupa kargu diresaun oioin, inklui Xefe Departamentu, Dekanu, Vise-Dekanu no Pró-Reitór. Nu’udar membru Konsellu Jerál UNTL no ezerse funsaun hanesan Adidu Komérsiu iha Embaixada Timor-Leste iha Jakarta, hosi tinan 2013 to’o 2015. 

Dezde tinan 1994, sai nu’udar membru organizasaun estudantíl “Resistência Nacional dos Estudantes de TimorLeste” (RENETIL), iha luta ba libertasaun nasionál.

Nia simu pose nu’udar Ministru Ensinu Superiór, Siénsia no Kultura iha loron 1 fulan-jullu tinan 2023, iha Governu Konstitusionál IX.

Governu hamutuk iha omenajen sira ne’ebé fó ona no dala ida tan hato’o kondolénsias ba família enlutada.