Iha loron 5 fulan Abril, Ministra Finansa prezide serimónia despedida ba bolseiru timor oan 13 ne’ebé bá ona Bangalore, Índia, hodi hasai kursu ida iha nível universidade iha área Teknolojia ba Informasaun (TI). Bolsa Estudu sira ne’e hetan finansiamentu hosi Programa Kapasitasaun kona-ba Jestaun Finanseira no Planeamentu (PFMCBP – Planning and Financial Management Capacity Building Program), nu’udar programa plurianuál ida ne’ebé konta ho partisipasaun hosi doadór oin-oin, ne’ebé hetan administrasaun hamutuk no jestaun hosi Banku Mundiál no Ministériu Finansa. Hein katak ho inisiativa ida ne’e bele rezulta iha fortalesimentu ba suporte tékniku TI nian iha jestaun finansa públika Ministériu Finansa nian, bainhira bolseiru sira fila fali mai Timor-Leste, hafoin hotu tiha sira nia estudu.

Ida ne’e hanesan grupu datolu bolseiru timor oan, ne’ebé Ministériu Finansa haruka ba estuda iha estranjeiru. Iha fulan Abril 2010, Ministériu Finansa haruka bolseiru timor oan 21 ne’ebé nain rua ho nível estudu pós-graduadu no sira seluk nu’udar lisensiadu, bá estuda iha Adelaide, Austrália, kona-ba Kontabilidade Emprezariál no Ekonomia. Iha fulan Setembru 2010, Ministériu Finansa haruka grupu darua hamutuk estudante nain 10 hodi bá estuda Estatístika iha Jakarta, Indonézia.

Bolseiru ba TI nain 13 ne’e submete ba prosesu selesaun ida ne’ebé iha kompetisaun no transperénsia, ne’ebé Diresaun-Jerál ba Servisu Korporativu (DGSK) Ministériu Finansa nian mak halo hahú tama fulan Agostu 2010. Kandidatu hitunulu resin haat halo teste Matemátika no Inglés iha loron 23 fulan Agostu 2010. Hosi kandidatu sira ne’e, ema nain sanulu mak selesionadu nu’udar bolseiru hodi bá Jakarta no nain sanulu resin tolu mak manán bolsa estudu TI hodi bá Índia. Estudante sira ne’e tenke halo hotu sira nia kursu iha tinan tolu nia laran, hafoin fila fali mai Timor-Leste hodi kumpri sira nia servisu iha Ministériu Finansa iha períodu mínimu tinan hitu.

Índia hetan rekoñesimentu nu’udar país ida ne’ebé fó formasaun di’ak ba pratikante sira TI nian.