Governo manifesta profundu pezar ba Ministru Ensinu Superiór, Siénsia no Kultura José Honório da Costa Pereira Jerónimo nia mate
Prezidénsia Konsellu Ministrus
Portavós Governu Timor-Leste
IX Governu Konstitusionál
...........................................................................................................................
Loron 21 fulan-abríl tinan 2026
Komunikadu Imprensa
Governu espresa tristeza boot ba Ministru Ensinu Superiór, Siénsia no Kultura, José Honório da Costa Pereira Jerónimo nia mate
Ho laran triste ne’ebé kle’an Governu Timor-Leste ohin, loron 21 fulan-abríl tinan 2026, simu notísia, kona-ba Ministru Ensinu Superiór, Siénsia no Kultura, José Honório da Costa Pereira Jerónimo ninia mate ne’ebé ita hotu la espera.
José Honório da Costa Pereira Jerónimo moris iha Bazartete, Munisípiu Likisá, iha loron 15 fulan-fevereiru tinan 1973. Hasai lisensiatura iha Estudu Dezenvolvimentu iha tinan 2001, iha Institutu Teknolojia no Siénsia Mandala, Indonézia, no remata mestradu iha área ne’ebé hanesan iha tinan 2010, iha Universitas Kristen Satya Wacana, Salatiga, Indonézia.
Nia ezerse funsaun akadémika iha Universidade Nasionál Timor Lorosa’e (UNTL) dezde 2001, iha ne’ebé nia okupa kargu diresaun oioin, inklui Xefe Departamentu, Dekanu, Vise-Dekanu no Pró-Reitór iha área oioin jestaun universitária nian. Nune’e mós nu’udar membru Konsellu Jerál UNTL no ezerse funsaun hanesan Adidu Komérsiu iha Embaixada Timor-Leste iha Jakarta, hosi tinan 2013 to’o 2015.
Dezde tinan 1994, sai nu’udar membru organizasaun estudantíl “Resistência Nacional dos Estudantes de TimorLeste” (RENETIL), iha luta ba libertasaun nasionál.
Iha loron 1 fulan-jullu tinan 2023, simu pose nu’udar Ministru Ensinu Superiór, Siénsia no Kultura iha Governu Konstitusionál IX, hodi asume responsabilidade ba definisaun no ezekusaun polítika públika iha área ensinu superiór, siénsia no teknolojia nian, nune’e mós ba koordenasaun instituisaun sira iha setór ne’ebé iha nia tutela.
Ministru Prezidénsia Konsellu Ministrus no Portavós Governu, Agio Pereira, espresa ninia “tristeza boot ba José Honório da Costa Pereira Jerónimo nia mate, ne’ebé husik hela kontribuisaun importante ida ba dezenvolvimentu ensinu superiór iha Timor-Leste no reforsu instituisaun akadémika nasionál sira, hodi dedika ona ninia vida ba servisu públiku, edukasaun no dezenvolvimentu nasionál”. Nia hatutan tan katak “Governu hato’o ninia sentida kondolénsia sinsera ba família enlutada, amigu no timoroan sira hotu iha momentu lutu ida-ne’e”. REMATA
