Ministru Negósius Estranjeirus no Kooperasaun, Bendito dos Santos Freitas, iha loron 18 fulan-abríl tinan 2026, hahú vizita servisu lubuk ida ba Tailándia, Brunei Darussalam, no Filipinas, ho objetivu atu partisipa iha enkontru multilaterál sira no akompaña ajenda diplomátika Governu nian, inklui partisipasaun Primeiru-Ministru nian iha enkontru rejionál sira. 
Iha ámbitu hosi dezlokasaun ida-ne’e, Ministru partisipa iha Sesaun Komisaun Ekonómika no Sosiál Nasoins Unidas nian ba Ázia no Pasífiku (ESCAP) ba dala 82, ne’ebé hala’o iha loron 20 to’o 24 fulan-abríl iha Bankoke, Tailándia. Sorumutu ne’e halibur ministrus no reprezentantes hosi nasaun oioin iha rejiaun ne’e hodi diskute dezafiu no oportunidade sira relasiona ho dezenvolvimentu sustentável, inklui empregu, envellesimentu populasaun (populasaun ne’ebé katuas no ferik ba beibeik), inkluzaun sosiál no transformasaun ekonómika.
Tuir mai, iha loron 27 no 28 fulan-abríl Ministru sei partisipa iha Sorumutu Ministeriál ASEAN-Uniaun Europeia ba dala 25 iha Bandar Seri Begawan, Brunei Darussalam, ne’ebé halo parte iha diálogu institusionál entre bloku rua ne’e iha kuadru parseria estratéjika ne’ebé estabelese iha tinan 2020. Sorumutu ne’e permite atu avalia situasaun kooperasaun nian no define prioridade konjunta iha área sira hanesan ekonomia, seguransa no dezafiu globál.
Hosi loron 3 to’o 5 fulan-maiu, Ministru Bendito Freitas akompaña Primeiru-Ministru, Kay Rala Xanana Gusmão iha vizita ofisiál ba Brunei Darussalam. Tuir mai, hosi loron 7 to’o 9 fulan-maiu, sei akompaña mós Xefe Governu iha Simeira ASEAN ba dala 48, ne’ebé sei hala’o iha Cebu, Filipinas, iha ne’ebé Xefe Estadu no Governu sira hosi rejiaun ne’e sei kolia kona ba orientasaun estratéjika no desizaun polítika relevante sira ba Sudeste Aziátiku.
Iha dalan ba Tailándia, para iha Singapura, Ministru hasoru malu ho Embaixadora foun Repúblika Singapura nian ba Timor-Leste, Teo Lay Cheng, no ko’alia kona-ba hametin relasaun bilaterál no kooperasaun iha ámbitu preparasaun ba prezidénsia ASEAN nian iha futuru.