SEJD partisipa iha Sorumutu Konsellu Rejionál Ásia Pasífiku The International Award for Young People nian ba-dala 11
Sekretáriu Estadu Juventude Desportu, Miguel Manetelu, akompaña hosi Asesór Tékniku iha SEJD, Fernando da Costa, sei partisipa iha Sorumutu Konsellu Rejionál Ásia Pasífiku nian ba-dala 11 iha Nova Deli, iha India, hahú hosi loron 5 to’o 9 fulan Abril.
Eventu ne’e organiza hosi "The International Award for Young People" no "The Duke of Edinburgh’s Award International Association Asia Pacific Region".
Eventu ne’e hanesan sorumutu anuál ba Prezidente Organizasaun Nasionál no Diretór Nasionál sira hodi bele ko’alia kona-ba estratéjia "The International Award" nian iha nivel rejionál.
Tema ba sorumutu ne’e mak “Innovation & Award Development”, no programa sira ne’e sei inklui mós sesaun konsulta, Forum Estratéjiku ba Aliansa Diretór Nasionál sira nian ida, eventu espesiál no vizita estudu nian hodi hatudu prátika inovativa sira.
