Primeiru-Ministru, Kay Rala Xanana Gusmão ho Ministru Negósius  Estranjeirus,  Zacarias Albano da Costa, hala’o vizita ba Sekretáriu Jerál ASEAN, Surin Pitsuwan, loron 23, fulan Marsu, iha Jakarta.

Iha vizita Xanana Gusmão, mós halo sorumutu kortezia ho Sekretáriu Jerál ASEAN, hodi hato’o Timor-Leste nia kompromisu ba iha adezaun no Estadu membru sira ASEAN nian atu partisipa iha dezenvolvimentu infraestrutura iha Timor-Leste tuir Planu Estratéjiku Dezenvolvimentu Nasionál (PEDN).

Nune’e mós Sekretáriu Jerál ASEAN nian ho laran luak simu Primeiru-Ministru ho nia komitiva hodi  hateten katak “ASEAN kontinua nafatin kompromete atu servisu hamutuk ho Timor-Leste hodi nune’e bele asegura katak preparasaun ne’e iha área hotu la’o ho di’ak liuliu iha área kapasitasaun Rekursu Umanus, téknika atu bele partisipa rasik iha planeamentu ASEAN bainhira Timor-Leste admitidu ona” informa Sekretáriu Jerál  ASEAN Surin Pitsuwan iha sorumutu ne’e.

Aleinde ne’e, Sekretáriu Jerál ASEAN mós informa katak, iha futuru, ASEAN, liuliu iha parte ekonómiku, ne’ebé Timor-Leste seidauk hola parte iha implikasaun, tanba ne’e Timor-Leste tenke ajusta nia Lei sira, hodi loke aan ba investimentu, Komérsiu bai nasaun ASEAN hotu. Iha okaziaun ne’e  Primeiru-Ministru, informa ba Sekretáriu Jerál ASEAN katak, mensajen ida ne’e fó mós kompromisu ba Timor-Leste ho ASEAN atu servisu hamutuk hodi asegura  katak iha futuru Timor-Leste bele simu investimentu.

Iha oportunidade ne’e, Sekretáriu Jerál ASEAN mós hato’o sujestaun ba Primeiru-Ministru, Kay Rala Xanana Gusmão, kona-ba área komunikasaun iha Timor-Leste no investimentu ba iha joventude atu iha futuru bele halo kompetisaun maka’as iha nasaun membru ASEAN.

Sorumutu kortezia ne’e, Primeiru-Ministru aproveita oportunidade hodi konvida Sekretáriu Jerál ASEAN atu partisipa iha komemorasaun loron restaurasaun ba Independénsia Timor-Leste nian ba tinan 10, ne’ebé sei hala’o iha loron 20 fulan Maiu, tinan 2012. Sekretáriu Jerál, ASEAN, Surin Pitsuwan, maske tinan ida ne’e Sekretáriu Jerál ASEAN sei hala’o vizita mai Timor-Leste hodi haree rasik kondisaun Timor nian. Relasiona ho konvite Primeiru-Ministru nian, Sekretáriu Jerál ne’e, hateten katak nia prontu ho laran k’maan atu mai partisipa iha loron komemorasaun ba restaurasaun  independensia ba tinan sanulu ne’e.

Halo parte iha komitiva Primeiru-Ministru nian, mak Primeiru-Ministru rasik, Ministru Negósius Estranseirus, Zacarias Albano da Costa, Ministru Ekonomia no Dezenvolvimentu, João Gonçalves, no Embaixador Timor-Leste, iha Indonézia, Manuel Serrano.