Governu Timor-Leste

Iha loron 13 fulan-abríl tinan 2026, Ministra Solidariedade Sosiál no Inkluzaun, Verónica das Dores, dezloka ba Jogjakarta, Indonézia, hodi sai sasin ba asinatura akordu kooperasaun ida entre Ministériu Solidariedade Sosiál no Inkluzaun (MSSI) no Nuansa Global, ho objetivu atu reforsa kapasitasaun rekursus umanus Ministériu ne’e nian. 

Akordu ne’e estabelese kuadru kooperasaun institusionál ida ne’ebé sai hanesan baze legál no operasionál ba implementasaun programas formasaun nian, ho objetivu atu hasa’e funsionáriu MSSI sira-nia kompeténsias téknikas, prátikas no profisionais, iha área sira ne’ebé relevante ho atendimentu públiku no servisus sosiais.

Inisiativa ne’e ho objetivu atu hadi’a kualidade prestasaun servisus públikus, ho atensaun espesiál ba grupu sira ne’ebé vulneravel liu, liuhusi investimentu iha kualifikasaun ba ninia rekursus umanus.

Programas formasaun nian ne’ebé prevee ona inklui konteúdu sira iha área jestaun finansas públikas, administrasaun rekursus umanus no área formasaun profisionál sira seluk, ho intensaun atu hasa’e produtividade no kualidade dezempeñu institusionál nian.

Durante serimónia ne’e, Ministra Verónica das Dores apela ba funsionáriu sira atu bele partisipa iha formasaun ne’e ho responsabilidade no dedikasaun. Nia subliña importánsia atu kumpre oráriu no konsentrasaun iha konteúdu sira, hanesan kondisaun hodi asegura efikásia formasaun no obtensaun rezultadus aprendizajen nian. Nia destaka mós katak reforsu kapasidade hanesan kontribuisaun ida hodi hala’o knaar sira ho profisionalizmu.

Diretor Nuansa Global nian destaka importánsia husi akordu ne’e atu reforsa kooperasaun entre instituisaun rua no hateten katak perseveransa nu’udar elementu determinante ida hodi alkansa rezultadu sustentavel iha formasaun rekursus umanus.

Iha ámbitu hosi vizita ba Indonézia, Ministra hala’o mós vizita ba instituisaun sira ne’ebé fó asisténsia ba ema sira ne’ebé iha situasaun vulneravel, hodi akompaña funsionamentu servisus no mós modelu resposta sosiál sira ne’ebé adota ona.

Nuansa Global hanesan entidade ida ne’ebé nia sede iha Jogjakarta, ne’ebé espesializada iha formasaun profisionál no dezenvolvimentu rekursus umanus, ne’ebé foka iha kapasitasaun institusionál no teknolójika.