Iha loron 10 fulan-abríl tinan 2026, empreza Tivan Limited informa kona-ba identifikasaun mineralizasaun riti no osan-mean ho kualidade aas iha projetu Baukau no Osú iha Timor-Leste, bazeia ba rezultadu dahuluk husi análize laboratóriu ba amostras superfísie ne’ebé rekolle iha terrenu. 

Rezultadu ne’ebé hetan hosi amostra 12 hatudu konteúdu riti  to’o 17,4% no osan-mean 38,1 grama kada tonelada, nune’e mós prezensa kobaltu ho valór to’o 0,45%, ne’ebé afirma potensiál hosi área hirak-ne’e ba akontesimentu mineralizasaun polimetálika ho kualidade aas.

Tuir empreza, dadus ne’ebé hetan daudaun ne’e aliña ho rezultadu esplorasaun istóriku sira  ne’ebé hala’o hosi detentór konsesaun anteriór sira, inklui rejistus to’o grama 37,8 kada tonelada osan-mean, 14,59% riti no 1,12% kobaltu, ne’ebé reforsa konsisténsia no interese jeolójiku hosi projetu sira ne’e.

Projetu sira ne’e lokaliza maizumenus kilómetru 123 iha leste Dili nian, iha rejiaun ida ne’ebé ho karakterístikas jeolójikas ne’ebé relasiona ho depózitu riti no osan-mean nian ne’ebé signifikativu iha nivel rejionál, maske sei iha nivel esplorasaun ne’ebé ki’ik.

Tivan konklui ona akizisaun ba lisensas iha fulan-fevereiru tinan 2026 no prepara hela faze servisu foun, inklui kampaña adisionál sira amostrajen nian, mapeamentu jeolójiku no levantamentu jeofíziku, ho objetivu atu define alvu ba perfurasaun sira iha futuru.

Iha ámbitu husi enkuadramentu legál ne’ebé aplikavel, empreza ne’e mós dezenvolve hela prosesu parseria ida ho empreza estatál Murak Rai Timor no mós halo koordenasaun ho Autoridade Nasionál Minerais atu  hala’o atividade envolvimentu ho komunidade lokál no entidade relevante sira seluk.

Prezidente Ezekutivu Tivan nian, Grant Wilson, espresa ninia “satisfasaun ba partilla rezultadu hirak-ne’e, ne’ebé sei iha impaktu boot ba Timor-Leste, liuliu deskoberta osan-mean ho kualidade aas. Ami sei serbisu besik ho komunidade no parte interesada sira hodi planeia pasu sira tuirmai.”

Iha komunikadu Tiven nian, hatete katak “empreza serbisu hamutuk hela ho Autoridade Nasionál Minerais Timor-Leste, IP hodi hala’o serimónias iha munisípiu relevante sira, ho objetivu atu envolve formalmente komunidade lokál sira, veteranus, partes interesadas no reprezentantes governu nian” no mós katak “avansa hela estabelesimentu joint venture formál ida ba kada Projetu Osú no Baukau ho empreza estatál mineira Murak Rai Timor, EP, tuir ezijénsia hosi Kódigu Mineiru Timor-Leste”.

Rezultadu sira ne’ebé agora fó sai tenke apoia progresaun projetu nian ba faze perfurasaun esploratória.