TIMOR GAP, EP partisipa iha Offshore Technology Conference Asia (OTC Asia) 2026, ne’ebé hala’o husi loron 31 fulan-marsu to’o loron 2 fulan-abríl, iha Kuala Lumpur, Malázia, ho objetivu atu promove projetu nasionál no hametin relasaun ho parseirus indústria enerjétika. 

Iha eventu loron tolu ne’e, stand TIMOR GAP simu vizita husi profisionál indústria, prestadór servisu sira no reprezentantes setór enerjétiku nian, ne’ebé partisipa iha sorumutu téknika no troka informasaun kona-ba atividades offshore no onshore nian. Partisipante balu buka informasaun atualizada kona-ba dezenvolvimentu projetu Greater Sunrise no inisiativa sira seluk ne’ebé la’o hela iha Timor-Leste.

Eventu ne’e sura mós ho vizita husi Embaixadór Timor-Leste nian ba Malázia, Lisualdo Menezes Coimbra Gaspar, nune’e mós reprezentantes husi indústria enerjétika rejionál, inklui membrus  hosi Sabah Oil and Gas Services Council. Empreza internasionál no entidade sira iha setór ne’e hatudu ona sira-nia interese ba oportunidade kooperasaun no formasaun, no hala’o ona konversa esploratória ho objetivu atu dezenvolve parseria sira iha futuru.

Reprezentantes husi empreza oin-oin husi setór enerjétiku vizita stand hodi fahe esperiénsia no identifika área posivel sira kolaborasaun nian, inklui iha ámbitu dezenvolvimentu kompeténsia téknika no partisipasaun iha projetu enerjétiku sira.

Offshore Technology Conference Asia nu’udar eventu internasionál ida ne’ebé tinan rua halibur profisionál setór enerjétiku nian dala ida hodi partilla koñesimentu tékniku no sientífiku iha área rekursu offshore no kestaun ambientál, ne’ebé sai plataforma importante ida ba interkámbiu esperiénsia no estabelesimentu parserias iha setór ne’e.