Governu serbisu hamutuk ho Organizasaun Nasoins Unidas ba Alimentasaun no Agrikultura (FAO, akrónimu iha lian inglés), iha loron 8 fulan-abríl tinan 2026, entrega ekipamentu agríkola sira ba grupu agrikultór 28 iha Postu Administrativu Watulari, Munisípiu Vikeke, ho objetivu atu aumenta produsaun no reforsa seguransa alimentár. 

Inisiativa ne’e inklui distribuisaun tratór manuál 28 no mákina baku hare nian 28, ne’ebé fó ba agrikultór sira hosi suku 8 iha rejiaun ne’e. Grupu ida-idak simu ekipamentus lubun ida ne’ebé ho objetivu atu apoia atividade agríkola lokál sira no hadi’a efisiénsia iha preparasaun rai no prosesamentu pós-kolleita.

Asaun ne’e halo parte iha programa-pilotu ho durasaun tinan rua, ne’ebé dezenvolve hamutuk hosi Konsellu Nasionál ba Soberania, Seguransa Alimentár no Nutrisaun iha Timor-Leste (CONSSANTL, akrónimu iha lian portugés) no FAO, ne’ebé inklui munisípiu Kovalima no Vikeke, iha ámbitu projetu transformasaun sistema alimentár ne’ebé finansia hosi Fundu Konjuntu ba Objetivus Dezenvolvimentu Sustentavel Nasoins Unidas nian.

Durante serimónia ne’ebé hala’o iha Afaloikai, Xefe Gabinete hosi Vise-Primeiru-Ministru no Ministru Koordenadór Asuntus Sosiais, Arantes Isac Sarmento, destaka reforsu produsaun agríkola nu’udar baze soberania alimentár no mós subliña serbisu hamutuk instituisaun sira nian iha identifikasaun benefisiáriu sira no implementasaun programa.

 “Timor-Leste nu’udar país ida ho sidadaun sira ne’ebé serbisu badinas. Independénsia manán liuhosi esforsu no ho espíritu hanesan ne’e mak ita tenke kontinua serbisu nu’udar to’os-na’in, hodi bele garante ita-nia produsaun ai-han rasik no hamenus dependénsia esterna”, nia afirma.

Responsavel ne’e hanoin hikas katak Watulari, iha tempu uluk hanesan zona prinsipál ida ba produsaun agríkola nasionál no husu atu ekipamentu sira ne’ebé entrega daudaun ne’e utiliza ho responsabilidade, ho objetivu atu aumenta produtividade. Tuir dadus ne’ebé aprezenta, rejiaun ne’e iha rai agrikultura besik ektare rihun 4, entre rai sira ne’e, besik ektare 300 maka daudaun ne’e iha hela esplorasaun.

Iha ámbitu hosi inisiativa hanesan, FAO entrega mós motór haat ba tékniku sira Ministériu Agrikultura, Pekuária, Peska no Florestas nian, hodi apoia implementasaun projetu no akompañamentu ba atividade sira iha terrenu.

Marka prezensa iha serimónia ne’e maka reprezentante sira hosi CONSSANTL, FAO iha Timor-Leste, Ministériu Agrikultura, Pekuária, Peska no Florestas, Polísia Nasionál Timor-Leste, nune’e mós autoridade lokál, lider komunitáriu no grupu benefisiáriu sira.

Entrega ekipamentu sira-ne’e, fó benefísiu diretamente ba agrikultór sira besik 280 no halo parte iha esforsu Governu nian hodi hasa’e produsaun agríkola no promove seguransa alimentár iha país ne’e.