IV Governu Konstitusionál, liu hosi Sekretaria Estadu Rekursus Naturais halo lansamentu ofisiál ba Relatóriu Daruak Timor-Leste EITI (Extractive Industries Transparency Initiative), iha loron 25 fulan Marsu tinan 2011, iha Sentru Konvensaun Díli.

“Timor-Leste merese selebra nia susesu, tanba relatóriu Inisiativa Transparénsia Industria  Estrativa – EITI nian ne’e fó sai kona-ba rekonsiliasaun osan ne’ebé kompañia minarai no gás selu ba Governu no rendimentu ne’ebé Governu simu hosi kompañia operadór sira iha Tasi Timor. Nune’e mós iha relatóriu ne’e hatudu katak, dala ida tan Timor-Leste konfirma ninia sistema finansa minarai nian ne’ebé  sólidu no transparente liu”, hateten Sekretáriu Estadu Rekursus Naturais, Alfredo Pires.

“Liu hosi implementasaun inisiativa ne’e hatudu katak iha loron 1 fulan Jullu tinan 2010 Timor-Leste hetan rezultadu di’ak hodi sai hanesan Nasaun kumpridór dahuluk iha Ásia Pasífiku no datoluk iha mundu, no kona-ba transparénsia iha setór minarai nian, iha tinan 2010 Revenue Watch  Index hatuur Timor-Leste iha númeru 12 ne’ebé tuir kedas Estadus Unidus Amérika ne’ebé okupa númeru 11”, hatutan Alfredo Pires.

Iha fatin hanesan, Prezidente Komisaun Ekonomia, Finansa no Antí-Korrupsaun (Komisaun C Parlamentu Nasionál), Manuel Tilman, reprezenta Prezidente Parlamentu Nasionál, hateten katak, “kultura transparénsia ne’e rigorozu teb-tebes, tan ne’e Importante atu ita hotu hatene”.

Relatóriu ne’e hakerek ho lian tetun, portugés, inglés no lian indonésia, ne’ebé sei fahe ba ONG nasionál, Igreja, instituisaun F-FDTL, PNTL, instituisaun akadémika no lidér komunitária sira.