Vise-Ministra ba Asuntus ASEAN, Milena Rangel, partisipa iha Sorumutu Funsionárius Importante ASEAN-Reinu Unidu (AUKSOM) nian ba dala 5, ne’ebé hala’o iha loron 31 fulan-marsu iha Wilton Park, iha Reinu Unidu, tuir fali ho eventus komemorativus lubuk ida ne’ebé marka aniversáriu Parseria Diálogu Reinu Unidu-ASEAN ba dala lima. 

Sorumutu ne’e halibur funsionárius importantes hosi Estadus-Membrus ASEAN no Reinu Unidu, ne’ebé analiza progresus hosi Parseria Diálogu ASEAN-Reinu Unidu no mós define prioridades ba kooperasaun iha futuru. Halo avaliasaun ida  kona-ba implementasaun Planu Asaun ASEAN–Reinu Unidu 2022–2026, no identifika áreas prioridades iha pilár tolu Komunidade ASEAN nian, ho hanoin atu prepara Planu Asaun tuirmai, inklui seguransa marítima no siberseguransa, ekonomia dijitál, tranzisaun enerjétika, edukasaun, saúde, no mudansa klimátika.

Iha ámbitu aniversáriu dalimak hosi Parseria Diálogu ASEAN-Reinu Unidu, AUKSOM ba dala 5 inklui programa ida ne’ebé luan, ho espozisaun ida kona-ba  kooperasaun kulturál no kriativa entre ASEAN no Reinu Unidu, nune’e mós sesaun diálogu sira “Track 1.5″ kona-ba jeoekonomia no multilateralizmu, kooperasaun marítima, governasaun ba intelijénsia artifisiál, no mós debate ida ho bolseirus hosi  Programa Chevening  ASEAN kona-ba futuru relasoins entre parte rua ne’e.

Durante sorumutu ne’e, iha loron 1 fulan-abríl, Vise-Ministra hasoru malu ho Sekretária Estadu Parlamentár ba Igualdade no Indo-Pasífiku, Seema Malhotra, no ko’alia kona-ba dezenvolvimentu iha Sudeste Aziátiku no mós situasaun internasionál.

Iha loron 29 fulan-marsu, iha Londres, governante ne’e partisipa iha jantár ida ne’ebé organiza hosi Forum Emprezariál ASEAN-Reinu Unidu no organizasaun ligasaun emprezariál ida ho Malázia, akompaña hosi Embaixadór Timor-Leste ba Reinu Unidu no delegasaun. Durante eventu ne’e, aprezenta prioridades Timor-Leste nian hafoin nia adezaun ba ASEAN, ne’ebé foka ba kreximentu sustentável no inkluzivu no mós promosaun ba ambiente investimentu ida ne’ebé favoravel.