Iha loron 31 fulan-marsu tinan 2026, Ministru Prezidénsia Konsellu Ministrus, Agio Pereira, akompaña hosi Vise-Ministra Negósius Estranjeirus no Kooperasaun, Jesuína Maria Ferreira Gomes, no dirijentes hosi Ministériu Finansas, partisipa iha audiénsia ida ho Komisaun B Parlamentu Nasionál, iha Dili, iha ámbitu apresiasaun proposta rezolusaun ba ratifikasaun Memorandu Entendimentu entre Timor-Leste no Austrália kona-ba Kooperasaun Téknika ba Dezenvolvimentu. 
Objetivu hosi audiénsia ne’e atu fó esklaresimentu adisionál sira ne’ebé husu hosi Komisaun, liuliu kona-ba validade, atualidade no relevánsia prátika hosi instrumentu, tuir kompeténsias institusionais hosi entidade sira ne’ebé envolve.
Durante sesaun ne’e, Ministru Prezidénsia Konsellu Ministrus aprezenta informasoins kona-ba aspetu dokumentál, tradusaun, no prosedimentu sira ne’ebé relasiona ho Memorandu ne’e, inklui korrespondénsia foin lalais ne’e, sertifikasaun tradusaun, no mós enkuadramentu institusionál arkivu no tramitasaun governamentál nian.
Vise-Ministra Negósius Estranjeirus no Kooperasaun aprezenta enkuadramentu diplomátiku no internasionál instrumentu ne’e nian, no mós pozisaun Estadu nian kona-ba ninia manutensaun, atualidade no posibilidade atu efeitus hosi instrumentu ne’e mantein.
Ministériu Finansas esklarese dimensaun finanseira, orsamentál no operasionál hosi Memorandu ne’e, inklui ezisténsia implikasoins prátikas ne’ebé bele akontese ne’ebé fó impaktu ba aspetu finanseiru, programátiku ka administrativu.
Projetu proposta rezolusaun ba ratifikasaun Memorandu Entendimentu ida-ne’e hetan aprovasaun iha sorumutu Konsellu Ministrus nian ne’ebé hala’o iha loron 21 fulan-janeiru tinan 2026.
Instrumentu ne’e, ne’ebé asina iha fulan-fevereiru tinan 2003, estabelese kuadru jerál ida ba kooperasaun téknika entre Timor-Leste no Austrália, ho objetivu atu implementa projetu dezenvolvimentu sira ne’ebé aliña ho prioridades nasionais, inklui inisiativa sira ba asisténsia téknika, formasaun, konsesaun (fó) bolsas, destakamentu espesialistas no ezekusaun projetus hamutuk.