Polisia Nasionál Timor-Leste (PNTL) selebra ninia aniversáriu ba-11 iha loron 27 fulan Marsu tinan 2011, iha Palásiu Governu.
“Hau apresia tebes ho lideransa komisáriu Longuinhos Monteiro no Afonso de Jesus nian, ne’ebé dezempeña ho di’ak sira nia funsaun ho profisionalismu no dedikasaun. Ita bo’ot nain rua hetan hau nia konfiansa pesoál nu’udár Ministru Defeza No Seguransa, no hau fiar katak, konfiansa hanesan, sei mai hosi instituisaun seluk, hosi estadu no populasaun tomak”, hateten Primeiru-Ministru Kay Rala Xanana Gusmão iha ninia diskursu.
Loron ida ohin, ita hahú ho ksolok tanba ita nia Polisia Nasionál Timor-Leste simu ona responsabilidade hosi UNPOL atu kaer rasik seguransa ba ita nia rain, tanba ne’e imi tenke halo kompromisu ne’ebé klean atu halo imi nia kna’ar ho duni profisionalismu no dedikasaunebé di’ak tenke hasees an hosi politika atu servi povu no Nasaun ida ne’e ho di’ak, hatutan Xanana Gusmão.
Iha fatin hanesan, Komisáriu Longuinhos Monteiro hateten “hodi PNTL nia naran ha’u hakarak agradese ba esforsu ne’ebé Governu halo hodi determina kompromisu ba misaun foun PNTL nian nu’udár instituisaun tutela ba seguransa estadu nian hodi kaer rasik responsabilidade primária atu kumpri dever no obrigasaun konstitusionál. Nune’e mós ha’u hakarak rasik agradesimentu ba xefe komisáriu Luis Carilho ho nia membru UNPOL tomak ne’ebé durante ne’e akompaña hau nia efetivu sira ho pasiensia, dedikasaun nu’udár parseiru PNTL nian”.
“Ita sente haksolok hodi sai nain ba ita ninia responsabilidade rasik, hau husu atu ita hotu tenke hatudu ita ninia kompromisu ba mehi naruk ne’ebé ita hein iha tempu naruk, la’ós ba formalidade simbólika ne’ebé ohin ita asiste, maibé liu-liu ba ita nia responsabilidade, devér, obrigasaun hodi servi ita nia nasaun ho urgullu, sakrifisiu no dedikasaun” hatutan Longuinhos Monteiro.
Selebrasaun tinan ida ne’e, UNMIT entrega ona podér ezekutivu seguransa ninian ba PNTL. Iha selebrasaun ne’e mós fó kondekorasaun medalla méritu no medalla solidariedade, asina nota intedimentu entre BNN RI ho PNTL no entrega mós sertifikadu rekoñesimentu nian ba Ofisiál, Sarjentu no ajente sira PNTL, ho grau rekoñesimentu nian, Diak no Diak Liu iha funsaun sira ne’ebé mak sira ezerse ba.