Iha loron 26 fulan-marsu tinan 2026, iha Dili, Vise-Primeiru-Ministru no Ministru Koordenadór Asuntus Sosiais, Mariano Assanami Sabino, lidera diálogu sosiál ida ho joven no estudante sira, ho tema “Empoderamentu Juventude ho Karakter Forte ba Konstrusaun Paz, Estadu no Nasaun”. 

Hafoin hasoru malu ho estudante sira hosi ensinu sekundáriu iha kapitál no munisípiu sira, sesaun ida ne’e agora kobre juventude universitária  no joven sira seluk, ho objetivu atu reforsa kapasidade no karakter partisipante sira-nian no mós insentiva lideransa ne’ebé responsavel, partisipasaun ativa no kontribuisaun ba pás no dezenvolvimentu nasionál.

Durante diálogu, destaka valór sira hanesan responsabilidade, integridade, solidariedade, no dixiplina, no mós importánsia hosi inovasaun, kooperasaun, no kompromisu ba país. Subliña mós nesesidade atu prepara joven sira ba dezafius rejionál no internasionál, inklui iha kontestu integrasaun Timor-Leste nian ba ASEAN no partisipasaun iha espasus multilaterais.

Sorumutu ne’e hetan partisipasaun husi Ministru Juventude, Desportu, Arte no Kultura, Nélio Isaac Sarmento, Koordenadór-Jerál Gabinete Ministru Koordenadór Asuntus Sosiais, Arcanjelo Leite, no mós estudante sira husi universidade oioin no sentrus formasaun juventude iha Dili laran.

Inisiativa  ne’e nu’udar parte hosi esforsu Governu nian  atu reforsa envolvimentu juventude nian hodi harii pás, Estadu no Nasaun.