Ministru Negósius Estranjeirus no Kooperasaun, Bendito dos Santos Freitas, iha loron 27 fulan-marsu tinan 2026, iha Dili, asina Memorandu Entendimentu ida ho Embaixadór Índia ba Timor-Leste, Madan Kumar Ghildiyal, ne’ebé estabelese Mekanizmu Konsulta Bilaterál ida entre nasaun rua ne’e. 

Mekanizmu ne’e estabelese plataforma estruturada ida ba diálogu regulár iha nivel funsionárius importante, ho objetivu atu reforsa koordenasaun polítika no promove kooperasaun iha área prioritária sira, inklui komérsiu, edukasaun, saúde, no kooperasaun téknika. Mekanizmu ne’e mós prevee realizasaun trokas estratéjias kona-ba asuntu rejionál no globál ne’ebé sai interese komún.

Asinatura ne’e nu’udar parte hosi reforsu relasaun bilaterál entre Timor-Leste no Índia no mós estabelese instrumentu diálogu regulár ida hodi akompaña no dezenvolve kooperasaun entre nasaun rua ne’e.