Sekretariadu Permanente Forum ba Kooperasaun Ekonómika no Komersiál entre Xina no País Lian Portugés sira (Forum Makau), iha loron 24 fulan-marsu tinan 2026, iha Makau, hala’o Sorumutu Ordinária ba da-21, ho partisipasaun delegasaun hosi país membru sira, inklui Timor-Leste, hodi avalia implementasaun Planu Asaun 2024-2027 no define atividades ba tinan 2026. 

Delegasaun Timor-Leste reprezenta hosi Embaixadór Timor-Leste ba Repúblika Populár Xina, Loro Horta, no Delegadu Timor-Leste ba Sekretariadu Permanente Forum Makau, António Ramos da Silva. Sorumutu ne’e konta mós ho reprezentantes hosi Ministériu Komérsiu Xina, autoridades Rejiaun Administrativa Espesiál Makau, entidades diplomátika no país lian portugés sira, no mós prezide hosi Sekretáriu-Jerál Sekretariadu Permanente, Ji Xianzheng. Durante sorumutu ne’e, aprezenta pontu situasaun ba ezekusaun Planu Asaun, nune’e mós balansu ba atividade sira ne’ebé hala’o ona iha tinan 2025 no aprovasaun Planu Atividades ba tinan 2026.

Iha ámbitu sorumutu ne’e, delegasaun sira fahe informasaun kona-ba avansu sira ne’ebé alkansa ona iha implementasaun medidas ne’ebé hetan ona akordu, inklui inisiativa hodi promove komérsiu, investimentu no kooperasaun setoriál. Diskute mós preparativus ba Konferénsia Ministeriál Forum Makau oinmai, ne’ebé prevee ba tinan 2027.

Delegasaun Timor-Leste aprezenta avansu sira ne’ebé alkansa ona iha implementasaun Planu Asaun, ho foku atu hametin konektividade aérea no marítima ho Xina, dezenvolvimentu ba projetus iha área turizmu, peskas no agrikultura, no mós promosaun investimentu, tuir prioridades nasionál ba dezenvolvimentu ekonómiku.

Durante sorumutu ne’e, aprezenta mós atualizasaun ba kompozisaun hosi Sekretariadu Permanente, inklui nomeasaun foun ba funsaun koordenasaun no apoiu nian.

Reprezentantes hosi Estadus-Membrus Forum Makau nian reafirma kompromisu komún hodi hakle’an kooperasaun ekonómika no komersiál entre Xina no país lian portugés sira.