Edisaun ba dala 19 hosi programa “Página do Governo”, ne’ebé marka regresu hosi Ministru Obras Públikas, Samuel Marçal, sei transmite iha sesta-feira ida-ne’e, loron 27 fulan-marsu tinan 2026, tuku 8 kalan, iha Rádiu no Televizaun Timor-Leste (RTTL) no iha rede sosiál ofisiál sira.

Iha epizódiu foun ida-ne’e, Samuel Marçal fila-fali ba programa ne’e, hafoin sai bainaka  iha edisaun  dahuluk , ne’ebé transmite iha loron 14 fulan-marsu tinan 2025, hodi aprezenta serbisu ne’ebé hala’o ona iha setór infraestruturas no esklarese matérias ne’ebé sai interese públiku relasiona ho prioridades intervensaun hosi Ministériu Obras Públikas.

Entrevista ne’e aborda, entre  tópikusira seluk, ezekusaun orsamentu tinan 2025 nian, projetu estratéjiku prinsipál sira ne’ebé la’o hela, impaktu hosi investimentu públiku iha infraestruturas, planu diretór ba dezenvolvimentu sidade Dili, expansaun no hadi’a rede rodoviária, monitorizasaun ba kualidade obras , no mós perspetivas intervensaun nian to’o tinan 2028.

Durante konversa ne’e, Ministru destaka importánsia hosi investimentu iha area estrada, bee, no eletrisidade, no mós subliña papél estruturante hosi infraestrutura sira-ne’e hodi apoia dezenvolvimentu ekonómiku, mobilidade populasaun, atividade agríkola, turizmu, no hadi’a kondisaun moris iha Timor-Leste laran tomak.

Epizódiu ne’e inklui mós reflesaun ida kona-ba nesesidade planeamentu urbanu ba kapitál, ho foku ba alargamentu  estrada sira iha Dili tuir faze no intervensaun sira ne’ebé planeia ona hodi responde ba kreximentu urbanu, hadi’a sirkulasaun rodoviária, no hametin reziliénsia infraestruturas nian.

Iha parte ikus entrevista nian, Samuel Marçal mós husik hela mensajen ida ba populasaun kona-ba impaktu sira husi tempu udan, iha ne’ebé nia mós husu atu prezerva ambiente, proteje área risku sira, no mós kolabora ho parte hotu-hotu hodi redús  kauza sira ne’ebé halo inundasaun sai makas liután, rai-halai, no sedimentasaun iha mota sira.

Programa “Página do Governo’’ lidera hosi Ministru Prezidénsia Konsellu Ministrus, Agio Pereira, programa ne’e prodús iha parseira ho RTTL no mídia nasionál sira, ho objetivu atu reforsa transparénsia governativa, prestasaun kontas no asesu sidadaun sira nian ba informasaun kona-ba desizaun no polítika prinsipál sira Ezekutivu nian.

Programa ne’e konta ho Nélia Chaves nu’udar aprezentadora no ho Ika Moniz hanesan produtora ezekutiva no mós hetan apoiu tékniku hosi ekipa mídia Prezidénsia Konsellu Ministrus nian, hosi Gabinete Primeiru-Ministru no gabinete hosi membru Governu ne’ebé hetan entrevista. “Página do Governo” sai hanesan espasu ida ba diálogu institusionál, ne’ebé foka liu ba interese públiku no hakbesik Governu ba sidadaun sira.

 

Governu konvida sidadaun hotu-hotu atu akompaña “Página do Governo” edisaun foun ida-ne’e iha sesta-feira, loron 27 fulan-marsu tinan 2026, tuku 8 kalan, iha RTTL no mídia sosiál sira.

Programa hotu-hotu ne’ebé tranzmite ona disponivel iha kanál YouTube @PCMPAGINADOGOVERNOTIMORLESTE