Primeiru-Ministru, Kay Rala Xanana Gusmão, hala’o sorumutu bilaterál ida ho Prezidente Repúblika Indonézia, Susilo Bambang Yudhoyono, iha loron 23, iha Palásiu Prezidensiál, iha Jakarta.

Primeiru-Ministru no Prezidente Repúblika ko’alia kona-ba dezenvolvimentu servisu nian, relasaun polítika, ekonómika, sosiál no kulturál, infraestrutura, komunikasaun, turismu no indústria, maibé ko’alia mós kona-ba edukasaun, kapasitasaun, agrikultura no peska. Hosi sorumutu ne’e, hamosu asinatura ba memorando entendimentu 5 kona-ba área hirak ne’ebé temi iha leten.

Membru Governu sira ne’ebé halo parte iha delegasaun Timor-Leste nian hodi asina Memorando Endimentu mak Ministru Negósiu Estranjeiru, Zacarias Albano da Costa, Ministro Infraestrutura no Ministru Agrikultura no Peska, Mariano Sabino no akompaña direta hosi Primeiru-Ministru, Kay Rala Xanana Gusmão no Prezidente Repúblika Indonézia, Susilo Bambang Yudhoyono.

Asinatura ba memorando entendimentu hirak ne’e implika ba país rua ne’e atu prepara ona ba kooperasaun entre rai rua ne’e, no sorumutu ne’e hanesan kontinuasaun ida ba sorumutu ida uluk nian kona-ba Joint Bilateral Community.

Governu Timor-Leste hato’o nia intensaun atu sosa ekipamentu militár Indonézia nian ne’ebé tuir Indonézia sei prontu atu fó kréditu ba Timor-Leste.

Kona-ba kestaun polítika nian, iha esforsu ida atu buka solusaun ba fronteira, nune’e, iha asuntu ida ne’e ko’alia mós kona-ba dezenvolvimentu ba indústria sira iha rejiaun fronteira nian.