Iha loron 17 fulan-marsu tinan 2026, iha Palásiu Governu, Dili, Ministru Prezidénsia Konsellu Ministrus, Agio Pereira, hala’o sorumutu ho Koordenadora Unidade Planeamentu Integradu (UPI) Ministériu Planeamentu no Investimentu Estratéjiku, Epi Orleães, no ninia ekipa, iha ámbitu koordenasaun elaborasaun ba Planu Médiu Prazu Governu tinan 2027-2030 ba setór Kuadru Institusionál. 

Elaborasaun ba planu ida-ne’e hafoin konkluzaun Relatóriu Monitorizasaun Progresu husi Planu Estratéjiku Dezenvolvimentu (PED) tinan 2011–2030, ne’ebé aprezenta iha Konsellu Ministrus iha loron 4 fulan-marsu tinan 2026, no ho objetivu atu orienta faze finál husi implementasaun PED.

Daudaun ne’e, Unidade Planeamentu Integradu lidera no koordena hela serbisu tékniku ba preparasaun Planu Médiu Prazu nian, ho envolvimentu hosi entidade governamentál oioin. Kona-ba setór Kuadru Institusionál, serbisu sira ne’e lidera husi Ministru Agio Pereira, iha koordenasaun ho Ministériu Interiór, Ministériu Administrasaun Estatál, Ministériu Finansas, Ministériu Justisa, Ministériu Defeza, Ministériu Negósius Estranjeirus no Kooperasaun, no mós Komisaun Funsaun Públika.

Iha ámbitu ba prosesu ida-ne’e, UPI foin lalais ne’e hala’o ona workshop ida ho instituisaun sira Governu nian, ho objetivu atu fahe orientasaun no rekolle kontribuisaun ba elaborasaun planu ne’e. Prevee mós reuniaun téknika ida ba loron 23 no 24 fulan-marsu, ne’ebé promove hosi Ministériu Planeamentu no Investimentu Estratéjiku, ho objetivu atu analiza, armoniza no konsolida kontribuisaun sira ne’ebé submete hosi liñas ministeriais oioin, atu asegura aliñamentu estratéjiku no konsisténsia informasaun nian.

Relatóriu Monitorizasaun Progresu PED 2011–2030 nian analiza ona progresu husi metas 199 ba tempu badak no médiu, ne’ebé distribui iha setór lima: Kapitál Sosiál, Infraestruturas, Dezenvolvimentu Ekonómiku, Kuadru Institusionál no Vizaun Makroekonómika, no mós identifika avansu sira ne’ebé alkansa ona husi tinan 2011 to’o 2024, no dezafius estruturais ne’ebé persistente, no prioridades asaun to’o tinan 2030.

Iha setór Kuadru Institusionál, husi metas 44 ne’ebé identifika ona, neen maka konklui ona, 27 hatudu progresu ne’ebé siginifikativu, no 11 hatudu progresu parsiál, la eziste metas ne’ebé laiha progresu.

Iha sorumutu ne’e, Ministru Agio Pereira ne’ebé akompaña husi ekipa téknika ida Prezidénsia Konsellu Ministrus nian, ne’ebé komposta husi Asesora Prinsipál hosi ninia Gabinete, Ika Moniz, Diretór-Jerál Administrasaun, Pedro Feno, Diretór Nasionál Administrasaun, Finansas no Patrimóniu, Nelson Maria dos Santos Menezes, Koordenadora Gabinete ba Dezenvolvimentu Polítikas Públikas, Natália Sarmento, Koordenadór Gabinete Planeamentu, Edinho Gonzaga Soares, no Xefe Gabinete Vise-Ministru Asuntus Parlamentares nian, Sanio Fernandes.