Primeiru-Ministru Kay Rala Xanana Gusmão, akompaña husi Ministru Administrasaun Estatál, Tomás do Rosário Cabral, inaugura edifísiu Balkaun Úniku iha Postu Administrativu Lospalos, munisípiu Lautein, iha loron 16 fulan-marsu tinan 2026. 

Abertura Balkaun Úniku ida-ne’e halo parte iha prosesu modernizasaun administrativa no esforsu atu hakbesik servisu públiku ba populasaun, hodi permite sidadaun sira hetan asesu ba servisu oin-oin Estadu nian iha fatin ida de’it, ho lalais, fasil no transparente liu. Estrutura foun ne’e, liuliu, atu hamenus tempu, kustu no nesesidade dezlokasaun populasaun sira ne’ebé hela do’ok husi kapitál.

Iha Balkaun Úniku Lautein nian, agora servisu sira hanesan emisaun billete identidade, pasaporte no sertifikadu rejistu kriminál. Funsionamentu hosi estrutura ida-ne’e nu’udar rezultadu kolaborasaun entre Ministériu Administrasaun Estatál ho ministériu no instituisaun públika oioin, liuliu Ministériu Justisa, ne’ebé responsavel ba sistema ne’ebé relasiona ho emisaun dokumentus, no mós Ministériu Transportes no Komunikasoins, ne’ebé garante kondisaun konektividade ne’ebé presiza atu servisu ne’e bele funsiona. Inisiativa ne’e hetan mós apoiu hosi PNUD, parseiru ba prosesu ne’e dezde tinan 2023.

Iha ninia intervensaun, Ministru Administrasaun Estatál fó hanoin katak Balkaun Úniku estabelese ona iha Manatutu, Baukau, Dili, Ataúru, Likisá, Aileu, Manufahi, Kovalima, Oe-Kusi no Bobonaru, no oras ne’e inaugura ona Balkaun Úniku iha Lautein. Nia mós indika katak Balkaun Úniku iha Ermera sei inaugura iha tempu besik, no Balkaun Úniku ne’ebé iha Vikeke no Ainaro iha hela faze konstrusaun.

Iha nia diskursu, Ministru Administrasaun Estatál afirma katak “Balkaun Úniku permite hakbesik Governu ba populasaun, hodi halibur iha fatin ida de’it servisus ne’ebé nesesáriu ba sidadaun sira hodi bele trata sira-nia dokumentu ho fasil liu”.

Prezidente Autoridade Munisipál Lautein, Mélio de Jesus, agradese ba Governu ba konstrusaun edifísiu ne’e, ho hateten katak infraestrutura ida-ne’e sei hadi’a asesu populasaun nian ba servisus públikus no fasilita asesu ba dokumentu ofisiál sira iha munisípiu ne’e rasik.

Ho inaugurasaun ida-ne’e, Governu kontinua habelar rede Balkaun Úniku iha territóriu nasionál tomak, hodi reforsa prezensa atendimentu públiku iha munisípiu sira no fasilita asesu populasaun nian ba administrasaun Estadu.