Iha loron 12 fulan-marsu tinan 2026, Governu inaugura Balkaun Úniku iha Postu Administrativu Maliana, Munisípiu Bobonaru, iha serimónia ida ne’ebé prezide husi Primeiru-Ministru, Kay Rala Xanana Gusmão, ho partisipasaun husi Ministru Administrasaun Estatál, Tomás do Rosário Cabral, no Reprezentante Rezidente Programa Nasoins Unidas ba Dezenvolvimentu (PNUD) iha Timor-Leste, Katyna Argueta. 

Abertura Balkaun Úniku ida-ne’e hanesan parte hosi prosesu modernizasaun administrativa no aproximasaun servisus públikus ba populasaun sira, permite sidadaun sira asesu servisu oin-oin Estadu nian iha fatin ida de’it, ho lalais, fasil no transparente liu.  Estrutura foun ne’e ho intensaun, liuliu, atu hamenus tempu, kustu no nesesidade dezlokasaun populasaun sira ne’ebé hela do’ok husi kapitál.

Iha Balkaun Úniku Bobonaru nian, agora servisu sira hanesan emisaun Billete Identidade, pasaporte no sertifikadu rejistu kriminál. Funsionamentu hosi estrutura ida-ne’e nu’udar rezultadu kolaborasaun entre Ministériu Administrasaun Estatál ho ministérius no instituisaun públika oioin, liuliu Ministériu Justisa, ne’ebé responsavel ba sistema ne’ebé relasiona ho emisaun dokumentus, no mós Ministériu Transportes no Komunikasoins, ne’ebé garante kondisoins konektividade ne’ebé presiza atu servisu ne’e bele funsiona. Inisiativa ne’e hetan mós apoiu hosi PNUD, parseiru ba prosesu ne’e dezde tinan 2023.

Durante serimónia ne’e, Primeiru-Ministru husu atu utiliza didi’ak infraestrutura foun no kumpre ho rigorozu ba responsabilidade sira ne’ebé relasiona ho servisu públiku, no mós husu ba povu Bobonaru atu “uza [servisu ida-ne’e] ho di’ak, evita falsifikasaun dadus no dokumentus,” no atu “serbisu ho responsabilidade no integridade.”

Iha ninia intervensaun, Ministru Administrasaun Estatál fó hanoin katak Balkaun Úniku estabelese ona iha Manatutu, Baukau, Dili, Ataúru, Likisá, Aileu, Manufahi, Kovalima, no Oe-Kusi, no oras ne’e inaugura ona Balkaun Úniku iha Bobonaru. Nia mós temi katak Balkaun Úniku iha Ermera no Lautein sei inaugura iha tempu besik, no Balkaun Úniku ne’ebé iha Vikeke no Ainaro iha hela faze konstrusaun.

Ministru Tomás Cabral esplika mós katak Balkaun Úniku funsiona hanesan sistema integradu ida husi prestasaun servisus públikus, iha kolaborasaun ho ministériu kompetente sira, no subliña ninia utilidade hodi fasilita sidadaun sira-nia asesu ba servisus Administrasaun Públika. “Balkaun Úniku bele fasilita no hakbesik liután governasaun ba povu. Ida-ne’e sai hanesan sentru ida husi Governu sentrál, ho informasaun hotu-hotu iha-ne’e,” nia hateten.

Reprezentante hosi Rezidente PNUD, Katyna Argueta, destaka katak estrutura foun reforsa prestasaun servisus públikus ba sidadaun sira no nu’udar pasu konkretu ida ba administrasaun públika ida ne’ebé efisiente, transparente no sentrada liu ba povu. Nia hatutan katak susesu husi inisiativa ne’e sei depende mós ba kontinuidade husi kompromisu ho servisu kualidade, responsabilizasaun no kapasidade resposta ba nesesidades populasaun nian.

Prezidente Autoridade Munisipál Bobonaru, Paulo Moniz Maia, agradese ba Governu no PNUD ba apoiu ne’ebé fó ona iha konkretizasaun infraestrutura ida-ne’e, hodi salienta katak, hahú ohin, sidadaun sira husi munisípiu bele trata dokumentus iha fatin de’it.

Ho inaugurasaun Balkaun Úniku Bobonaru ne’e, Governu nafatin halo expansaun neineik-neineik husi modelu atendimentu integradu ida-ne’e iha territóriu nasionál tomak, iha ámbitu polítika desentralizasaun administrativa no reforsu prestasaun servisus públikus ne’ebé besik liu ba populasaun.