Ministru Negósius Estranjeirus no Kooperasaun, Bendito dos Santos Freitas, akompaña Prezidente Repúblika, José Ramos-Horta, iha serimónia tomada-de-pose ba Prezidente Repúblika Portugál nian ba da-21, António José Seguro, ne’ebé substitui Marcelo Rebelo de Sousa. Serimónia ne’e hala’o iha loron 9 fulan-marsu tinan 2026, iha Asembleia Repúblika, iha Lizboa. 

Aleinde Xefe Diplomasia timoroan no Prezidente Repúblika Timor-Leste, ne’ebé hala’o funsaun hanesan Prezidénsia Komunidade País Lian Portugeza (CPLP, sigla iha lian portugés), marka prezensa mós husi figura internasionál sira ne’ebé aas, maka hanesan Rei Filipe VI husi España no Prezidente sira husi Repúblika Angola, João Lourenço, São Tomé e Príncipe, Carlos Manuel Vila Nova, Cabo Verde, José Maria das Neves, no Mozambique, Daniel Chapo.

Iha nia diskursu, Prezidente António José Seguro hato’o “saudasaun ida ne’ebé ho ksolok” ba Prezidente Ramos-Horta no Xefe Estadu sira seluk hosi nasaun CPLP nian ne’ebé marka prezensa iha serimónia ne’e, hodi afirma katak sira-nia prezensa “simboliza forsa hosi lasu istóriku, kulturál no ekonómiku ne’ebé halibur ita-nia povu no reafirma valores kooperasaun, amizade no diálogu nian ne’ebé ita partilla”.

Xefe Estadu portugés foun afirma mós katak “iha ninia diversidade, komunidade luzófona hatudu katak lian komún ida bele mós sai hanesan meius ida hodi partilla ambisaun ida ne’ebé boot liu: projetu ida ba dezenvolvimentu no afirmasaun hamutuk iha mundu ida ne’ebé presiza liután entendimentu no dame”.